پاکستانی حکومت نے رمضان پیکیج کا اعلان کر دیا

وفاقی حکومت نے رمضان پیکیج کا اعلان کر دیا ہے جس کے تحت رمضان المبارک میں یوٹیلٹی سٹورز سے مختلف اشیاء کی خریداری پر پونے 2 ارب روپے کی سبسڈی دی جائے گی۔ یکم ستمبر سے سٹورز سے آٹا 15 روپے، چینی 30 روپے پچاس پیسے، دال چنا 47 روپے، سفید چنا 63 روپے، بیسن 59 اور  چائے 376 روپے فی کلو گرام دستیاب ہو گی۔ 1302 دیگر اشیاء بھی 5 سے 10 فیصد کم قیمت پر ملیں گی۔ اشیاء کی فراہمی اور ان کے معیار کو یقینی بنانے کیلئے تمام ضروری اقدامات کئے جائیں گے۔ رمضان پیکیج کا اعلان وزیر خزانہ سید نوید قمر نے ہفتے کو یہاں پریس کانفرنس سے خطاب کرتے ہوئے کیا۔ اس موقع پر سیکرٹری خزانہ فرخ قیوم اور منیجنگ ڈائریکٹر یوٹیلٹی سٹورز کارپوریشن بریگیڈیئر (ر) حفیظ احمد بھی موجود تھے۔ انہوں نے کہا کہ مہنگائی کی وجہ سے لوگوں کی مشکلات کا ہمیں انداز ہے۔ حکومت نے عوام پر بوجھ کم کرنے کیلئے رمضان پیکیج تیار کیا ہے۔ چار پانچ چیزوں کی قیمتیں خاص طور پر کم کی جا رہی ہیں۔ باقی اشیاء بھی کم قیمت پر ملیں گی۔ انہوں نے کہا کہ آٹے کی قیمتیں مختلف شہروں میں مختلف ہیں۔ رمضان میں سٹورز پر یہ 15 روپے فی کلو ملے گا اور اس کی دستیابی بھی یقینی بنائی جائے گی جبکہ گھی 110 روپے فی کلو، چینی 30 روپے 50 پیسے، دال چنا 47 روپے، بیسن 59 روپے، چائے 376 روپے فی کلو فروخت کیا جائے گا۔ انہوں نے کہا کہ 1300 کھانے اور دیگر اشیاء کی قیمتیں بھی 5 سے 10 فیصد کم کی جائیں گی۔ نئی قیمتوں پر یکم ستمبر سے عملدرآمد ہو گا۔ انہوں نے کہا کہ یوٹیلٹی سٹورز چھٹی والے دن بھی کھلے رہیں گے۔ اس کے علاوہ نگرانی کا عمل بھی سخت کیا جا رہا ہے تاکہ ذخیرہ اندوزی اور خورد برد کو روکا جا سکے۔ انہوں نے کہا کہ اشیاء کی دستیابی یقینی بنانا حکومت کی ذمہ داری ہے اور وہ یہ ذمہ داری پوری کرے گی۔ انہوں نے کہا کہ یوٹیلٹی سٹورز میں اس وقت آٹا 20 روپے فی کلو مل رہا ہے اور رمضان میں 15 روپے فی کلو قیمت سے عوام کو فائدہ ہو گا۔ انہوں نے کہا کہ سٹورز سے دکاندار پہلے اشیاء خریدے تھے اور پھر آگے مہنگی فروخت کرتے تھے لیکن اب حکومت اس بات کو روکنے کیلئے سخت اقدامات یقینی بنائے گی۔ انہوں نے کہا کہ حکومت رمضان میں تقریباً پونے دو ارب روپے کی سبسڈی دے گی۔ پنجاب حکومت بھی سستے بازار لگا رہی ہے اور ہم اس کے ساتھ تعاون سے عوام کو فائدہ پہنچائیں گے۔ انہوں نے کہا کہ دور دراز علاقوں میں اشیاء کی فراہمی بھی یقینی بنائیں گے جن لوگوں تک ہم پہنچ سکتے ہیں ان کو ریلیف دیا جائے گا۔ انہوں نے کہا کہ ٹوٹا چاول 45 اور باسمتی 88 روپے فی کلو ملے گا۔ چاول کی فروخت سے عوام کو 7 سے 12 روپے فی کلو رعایت دی جائے گی۔ انہوں نے کہا کہ حکومت ڈی سی اوز کے ذریعہ قیمتوں کی نگرانی اور دستیابی کیلئے اقدامات کرے گی۔ انہوں نے کہا کہ دودھ کی قیمتوں کو کنٹرول کرنے کیلئے اقدامات کئے جا رہے ہیں۔ ایم ڈی یوٹیلٹی سٹورز کارپوریشن بریگیڈیئر (ر) حفیظ احمد نے کہا کہ سٹورز پر اشیاء کی قلت کا کوئی خدشہ نہیں۔ انہوں نے کہا کہ بلوچستان اور سرحد میں ہم امپورٹڈ گھی کم قیمت پر دے رہے ہیں۔ اوپن مارکیٹ سے سٹورز پر اشیاء کی قیمتیں بہت کم ہیں۔ وزیر خزانہ نے کہا کہ درآمدی گندم کی قیمت 1200 روپے فی 40 کلو گرام بنتی ہے اور حکومت کم قیمت پر عوام کو دے رہی ہے۔ ایم ڈی یوٹیلٹی سٹورز نے کہا کہ اس وقت تک 5500 یوٹیلٹی سٹورز کھل چکے ہیں جن علاقوں میں سٹورز ہیں وہاں پر موبائل سٹورز نہیں چلائے جائیں گے۔ وزیر خزانہ نے کہا کہ یوٹیلٹی سٹورز پر اشیاء کی کوالٹی کے حوالے سے شکایات آئی ہیں، بالخصوص آٹے کے حوالے سے شکایات ہیں اور ہم نے ہدایت کی ہے کہ پسائی کو بہتر بنایا جائے اور اس مسئلے کو ہنگامی بنیادوں پر حل کرنا ہو گا۔ انہوں نے کہا کہ ذخیرہ اندوزی بھی ایک بڑا مسئلہ ہے اس پر قابو پانے اور ذمہ داروں کیخلاف کارروائی کیلئے ٹھوس اقدامات کئے جائیں گے۔ انہوں نے کہا کہ تیل کی قیمتیں عالمی منڈی میں کم ہو رہی ہیں اگر اس طرح کم ہوتی رہیں تو ایک طرح سے عوام کو فائدہ پہنچایا جائے گا۔ اب ڈیزل پر سبسڈی کم ہو کر 14 روپے فی لیٹر ہو گئی ہے۔ انہوں نے کہا کہ آٹے پر عوام کو 9 سے 10 روپے کا ریلیف ملے گا۔ یوٹیلٹی سٹورز پر گھی 110 روپے فی کلو دستیاب ہو گا جس سے گاہکوں کو 30 روپے کا ریلیف ملے گا۔ سفید چنا 63 روپے فی کلو دستیاب ہو گا۔ انہوں نے کہا کہ کارپوریشن نے ایک موثر نظام ترتیب دیا ہے جس کے تحت مانیٹرنگ ٹیمیں مختلف اوقات میں سٹورز کا دورہ کریں گی تاکہ اس بات کو یقینی بنایا جائے کہ تمام ضروری اشیاء سٹورز پر موجود ہیں۔