سب ہی یہاں ننگے ہیں

     غیر فعال چیف جسٹس افتخار چوہدری صاحب کا معاملہ ابھی کسی طرف نہیں لگا کہ موجودہ چیف جسٹس بھی اپنی بیٹی کے حوالے سے اعتاب میں آ گئے ہیں انکی بیٹی کو وہ کچھ مل گیا جو شاید ہی کسی کو ملا ہو اور جو کچھ ملا ہے اس کی قانون قطعی اجازت نہیں دیتا جس کی بابت خو سپریم کورٹ کا ہی ایک فیصلہ پہلے سے موجود ہے۔ جب افتخار چوہدری صاحب کا کیس سپریم کورٹ کے ایک فل بینچ میں زیرِ سماعت تھا تو بہت ساری چیزوں اور باتوں کا دامے درمے سخنے ذکر ہوا جن میں سے کچھ تو سینہ بہ سینہ چلتی رہیں اور کچھ پرنٹ اور الیکٹرونک میڈیا کی زینت بنیں اور اس سارے قضیے میں جو چیز سامنے آئی وہ یہ کہ ہمارے بھائی بندے اپنے مفادات کے لئے کسی بھی حد تک جا سکتے ہیں۔

    بات ہے مفادات کی تو جو کوئی نئی اور اچھوتی نہیں، سیکنڈری بورڈوں اور یوینورسٹیوں کی سیکریسی برانچوں میں آئے دن گھپلے بے نقاب ہوتے رہتے ہیں ، جعلی ڈگریاں جاری ہوتی ہیں اور لوگ پکڑ ے بھی جاتے ہیں مگر پھر بھی غیر قانونی کام کرنے والے اپنی حرکتوں سے باز نہیں آتے۔ رہی بات مفادات کی تو کون ہے جس نے کبھی کوئی مفاد نہ لیا ہو گا کسی نے کم یا کسی نے زیادہ مگر کبھی نہ کبھی کسی طور مفاد ضرور حاصل کیا یہ اور بات ہے کہ کوئی تو اپنی دولت میں اضافے کی خاطر کسی کی مدد کرتا ہے تو کوئی دولت بنانے کیلئے غیر قانونی کام کرنے پر راضی ہو جاتا ہے۔ دور کی بات نہیں ہے ماضی قریب ہی کے قصے ہیں ، آپ بھی نہیں بھولے ہونگے اور ہم بھی نہیں بھولے کہ لوگ سیاست میں آئے تو اپنے مفادات کے لئے ،مذہبی چولے پہنے تو اپنے مفادات کیلئے اور عوام کی محبت کا دم بھرا تو اپنے مفاد کی خاطر، غرض کیا سیاست دان، کیا جاگیر دار، کیا سرمایہ دار، یا جنرل اور کیا جج، کیا پیر اور کیا فقیر ، کیا شیخ اور کیا مولوی سب نے اس گنگا سے اشنان کیا اور اپنے تئیں پوتر ہونے کی کوشش کی مگر افسو س کہ یہ پوتر تو نہ ہوسکے مگر آپ کے اور ہمارے پیسے (دولت) لے اڑے اور ملک کو کنگال اور کھوکھلا کرتے گئے اور آج یہ حال ہے کہ ملک کو اپنی سلامتی اور بقا کیلئے دوسروں کے آگے ہاتھ پھیلانے پڑ رہے ہیں اور اس پر بھی بڑے خوش ہو رہے ہیں کہ ہمیں آئی ایم ایف نے قرض دے دیا ہے، قرض لینے والے یہ جانتے ہی نہیں یا جاننا نہیں چاہتے کہ قرض کی لعنت کتنی بری ہو تی ہے اور اس کی وجہ سے آگے چل کر کیا کیا مشکلات پیدا ہو سکتی ہیں۔

    یہ مفادات کا ہی تسلسل تھا کہ سول اور ملٹری بیوروکریسی کے علاوہ سیاسی، سیکولر اور مذہبی طبقہ کی وفاداریاں خریدنے کیلئے سرکاری زمینوں اور پلاٹوں کی الاٹمنٹ کے ساتھ ساتھ قرضوں کی معافی کس طرح سے ہوتی رہی۔ سابق صدر ضیاء الحق کے ساتھیوں کو دنیا کے امیر ترین جنرلوں کی فہرست میں شامل کیا گیا تھا، ان کے برادر نسبتی مشاہد الہی کے بارے میں ہے کہ انہوں نے 177کروڑ روپے کے قرضے لئے، اعجاز الحق کو1066مربع گز، الہی بخش سومرو کو1022مربع گز، ڈاکٹر محمد افضل کو855مربع گز، گل جی کو855مربع گز، میجر جنرل شاہ رفیع عالم کو600مربع گز زمین الاٹ ہوئی، میاں نواز شریف نے اپنے پہلے دور میں سرکاری اور قومی بینکوں سے4سو کروڑ کے قرضے لئے جو اگلے چند سالوں میں 12سو کروڑ تک جا پہنچے یعنی 12ارب روپے۔ پیپلز پاڑٹی کے ذوالفقار علی بھٹو کے دور میں بھی بے شمار گھپلے ہوئے، بے نظیر کے بھی دونوں ادوار میں بے شمار قصے کہانیاں منظر عام پر آتی رہیں۔ سیاستدانوں کے ساتھ ملاں طبقہ بھی پیچھے نہیں رہا، مولانا فضل الرحمن سے منسوب کیا کیا باتیں گردش میں نہیں ہیں، عبد الغفور حیدری صاحب کے بارے میں اخبارات کی رپورٹیں گواہ ہیں ایک ضمنی الیکشن میں کھٹرے ہوئے اور بیٹھنے کیلئے انہوں نے بھی کتنے ہی پیسے لئے۔ان لوگوں پر ہونی والی نوارشات کا کیسے کیسے ذکر کروں اس کے لئے صفحوں کے صفحے چاہیں اور سالوں لگ جائیں گے لیکن یہ فہرست ختم نہ ہوگی۔

    آج جسٹس عبد الحمید ڈوگر صاحب خود ملٹری بیوروکریسی کے ساتھ ملکر چیف جسٹس بنے بیٹھے ہیں تو کل افتخار چوہدری صاحب نے بھی یہی کام کیا تھا اور ان کی سربراہی میں بننے والے بینچ نے ہی فوجی حکومت (سابق صدر جنرل مشرف) کو بن مانگے حکومت کرنے کے لئے نا صرف وقت دیا تھا بلکہ ان کے اس عمل کو کسی حد تک جائز بھی قرار دیا۔عبد الحمید ڈوگر کی بیٹی نے ناجائز طور پراپنے نمبر بڑھوالئے ہیں تو کیا ہوا، جو لوگ اس کے خلاف واویلا کررہے ہیں بہت ممکن ہے کہ ماضی میں خود بھی ایسی ہی حرکتیں کرتے رہے ہوں،سیاست دانوں میں کتنے ہی لوگ جو وزیر رہے یا ہیں کی ڈگریا ں تک جعلی ہیں یا معیاری نہیں ہیںبلکہ ایک کیس تو پچھلے دور سے اب تک التوا میں چلا آ رہا ہے جس میں اس ایم پی اے کی ڈگری کی اصلیت کو کورٹ میں چیلنج کیا گیا تھا۔ رہی بات کہ افتخار چوہدری صاحب آج  بحال بھی ہو جائیں تو بھی ہمارے اور عام لوگوں کے مسائل جوں کے توں ہی رہیں گے کیونکہ مفادات سمیٹنے میں ہمارے تمام بڑے رہنما او ر لیڈران کرام ایک ، متحد اور یک جان نظر آتے ہیں کیونکہ اس ضمن میں یہ سب لوگ ننگے ہیں ، کوئی کسی کا محاسبہ کرے بھی تو کیسے کرے ،مزید یہ کہ یہ اور بات ہے کہ جب کسی کے انفرادی مفادپر زد پڑتی ہے تو اسے ملکی مفاد دکھائی دینے لگ جاتا ہے جبکہ عمومی طور پر ان کی آنکھوں پر پٹی بندھی ہوتی ہے یا چربی چڑھی ہوتی جو کچھ بھی دیکھنے سے قاصر ہوتے ہیں، الغرض کس کس بات کا رونا رویا جائے کیونکہ کیا سیاستدان اور کیا فوجی، کیا مولوی اور کیا سرمایہ دارکیا جاگیردار سب ہی نے ہماری آرزؤں کا گلہ گھونٹا ،ہمارے جذبات کو مجروع کیا اور ہمارے حقوق کو جوتی کی نوک پر رکھا۔