پاکستان کے دو سابق وزرائے اعظم یعنی ”مرد آھن ”نواز شریف اور” بیباک” بی بی بے نظیر بھٹو نے لندن میں اپنی ملاقات کے بعد کہا ہےکہ انہوں نے اپنے اپنے جیالوں کو کہا ہے کہ وہ 26 مارچ کو پاکستان بھر میں ضلعی سطحوں پر حکومت کے خلاف احتجاجی مظاہرے کریں ۔ اور ملک میں جسٹس افتخار محمد چوھدری کی عہدے سے معطلی کی وجہ سے عدالت عالیہ کے وقار کو جو نقصان پہنچا ہے اسے بحال کرائیں ۔ ان دونوں رہنموں نے اسی موقع پر ‘ جیسا کہ برطانوی خبر رسان ایجنسی رائیٹر نے بتایا یہ بھی کہا ہے کہ“ ملک میں جاری ’عدالتی بحران‘ نے انتخابات کے انعقاد کو مشکوک بنا دیا ہے۔“ ان دونوں نے یہ بھی کہا ہے کہ “ نیٹو فورسز ہمسایہ ملک افغانستان میں جمہوریت کے لیے جانیں قربان کر رہی ہیں لیکن دوسری طرف امریکہ اور برطانیہ پاکستان میں ملکی اداروں پر جنرل مشرف کے حملوں پر آنکھیں بند کیے ہوئے ہیں۔ نواز شریف اور بے نظیر نے مزید کہا کہ“ اگرافغانستان میں جمہوریت کا دفاع ضروری ہے تو پھر پاکستان میں بھی جمہوریت بحال کی جائے-“
ہم پاکستان میں‌جمہوریت کی بحالی سے تو ہرگز انکاری نہیں ۔ جمہوریت بحال ہونی چاہیے اور لازمی ہونی چاہیے ۔ لیکن اس کے لیے نواز شریف اور بے نظیر کی جانب سے برطانیہ اور امریکہ کو پاکستان میں اقدامات لینے کی دعوت دینے جانے
سے ہم خائف ضرور ہیں ۔ ہمسایہ ملک افغانستان میں جموریت کی بحالی کے نام پر امریکہ کی سربراہی میں نیٹو افواج جو گل کھلا رہی ہیں اور جس طرح وہاں کشت و خون جاری ہے کیا پاکستان کے یہ دونوں جلا وطن رہنما بھی پاکستان میں یہی کچھ ہوتا دیکھنا چاہتے ہیں؟ کیا بے نظیر بھٹو اور نواز شریف چاہتے ہیں کہ نیٹو افواج افغانستان ہی کی طرح جمہوریت کی بحالی کے لیے پاکستان کا بھی رخ کریں ؟ بے نظیر بھٹو اور نواز شریف پاکستان میں جمہوریت کے لیے اگر افغانستان سے نیٹو افواج کی مدد چاہتے ہیں‌تو پھر ہم ئہ سمجھنے سے قاصر ہیں کہ یہ دونوں رہنما لندن میں بیٹھے پاکستان میں اپنے جیالوں کو مظاہروں کے لیے کیوں کہہ رہے ہیں اور ان سے سیدھے الفاظ میں یہ کیوں نہیں کہہ دیتے کہ وہ “ پاکستان میں نیٹو افواج کو خوش آمدید کہنے کے لیے اپنے اپنے پرچم لے کر درہء خیبر پہنچ جائیں ! او موقع پر ہمیں میر کا یہ شعر نجانے کیوں یاد آریا ہے ۔ آپ بھی سن لیجیئے:
میر بھی کیا خوب ہیں ‘ بیمار ہوئے جس کے سبب
اسی عطار کے لونڈے سے دوا لیتے ہیں ۔