تخفیف اسلحہ کا ہفتہ ہر سال 24 تا 30 اکتوبر منایا جاتا ہے۔ اقوام متحدہ کی جنرل اسمبلی میں آئی اے ای اے کی رپورٹ پر مباحثہ کے دوران اقوام متحدہ کیلئے پاکستان کے مندوب رضا بشیر ترار نے واضع کیا ہے کہ پاکستان ایٹمی عدم پھیلائو کے عزم پر قائم ہے اور پاکستان کا سیف گارڈ کمانڈ اینڈ کنٹرول سسٹم انتہائی موثر ہے۔ نیو کلیئر توانائی کا پرامن استعمال ہر ملک کا حق ہے اس بات کو یقینی بنانے کیلئے عالمی سطح پر بلا امتیاز طریقہ کار وضع کیا جائے اور سول نیو کلیئر ٹیکنالوجی تک رسائی کیلئے مصلحت اور کاروباری مفادات سے بالاتر ہوکر اصول وضع کئے جائیں۔ پاکستان اپنے نیو کلیئر پاور جنریشن پلان کی تکمیل میں آئی اے ای اے کی معاونت کا خواہاں ہے۔ بین الاقوامی معیار کے مطابق پاکستان کا اٹامک انرجی ڈویلپمنٹ پروگرام ہمیشہ نیو کلیئر سیفٹی اور سیکورٹی کے لئے تسلیم شدہ ہے۔
دنیا میں امن قائم کرنے کے نام پر ہلاکت خیز ہتھیاروں کی تیاری اور خریدوفروخت کا عمل تخفیف اسلحہ اور ہتھیاروں کے عدم پھیلائو پر مبنی معاہدوں، ضابطوں اور اس ضمن میں کی جارہی کوششوں کا منہ چڑا رہا ہے۔
بڑی طاقتیں اس ضمن میں بے حد ستم ظریف واقع ہوئی ہیں۔ ایک طرف تو یہ تخفیف اسلحہ اور عدم پھیلائو کی کوششوں میں شریک اور سرگرم ہوتی ہیں اور دوسری طرف ہتھیاروں کی پیداوار، ترقی اور خریدوفروخت کا بازار کبھی ٹھنڈا نہیں پڑنے دیتیں۔ کسی ملک کی مشکیں کسنا مقصود ہو تو عدم پھیلائو کے کسی بھی بے کار پڑے ہوئے معاہدے کو اٹھایا جاتا ہے اور اس کے اطلاق اور نفاذ کا پروپیگنڈہ کرکے ناپسندیدہ ملک کو دھونس اور دھمکیاں دے کر دبائو ڈالنے کا عمل شروع کردیا جاتا ہے۔ اقوام متحدہ کے کسی ادارے کو متحرک کرتے ہوئے مخالف ملک پر چڑھائی کرنے کی راہ ہموار کی جات یہے۔ عموماً آئی اے ای اے کو اس مقصد کیلئے استعمال میں لایا جاتا ہے۔ ایسا کچھ نہ ہوسکے تو براہ راست الزامات عائد کردیئے جاتے ہیں۔ جس طرح پاکستان کیخلاف ایٹمی پھیلائو کی بے بنیاد اور بے اصل مہم چلائی گئی اور پھر بھارت کے ساتھ سٹرٹیجک تعاون کے یک نئے مرحلے کا آغاز کردیا گیا۔ امریکہ اور فرانس نے بھارت کے ساتھ جوہری معاہدے کرلئے ہیں۔ تخفیف اسلحہ کی تمام کوششیں اور سمجھوتے دھرے کے دھرے رہ گئے۔ امریکہ اور یورپ کی یہی روایت رہی ہے کہ انہوں نے ہتھیاروں کی تجارت کو کبھی کم نہیں ہونے دیا۔ جسے چاہا اور جیسے چاہا اسلحہ فروخت کیا، ٹیکنالوجی منتقل کی۔ بھارت نے اپنے قیام کے پہلے دن سے جدید ہتھیاروں بالخصوص غیر روایتی ہتھیاروں کی ٹیکنالوجی حاصل کرنے کی تگ و دو شروع کردی تھی اور وقت گزرنے کے ساتھ ساتھ اس کی کوششوں میں اضافہ ہوتا چلا گیا۔ اسے دنیا کی دو بڑی جنگی صنعتوں کا تعاون اور اشتراک ہمیشہ حاصل رہا ہے۔ 1947ء میں کشمیر پر قبضہ کرنے کے بعد بھارت نے اپنی جنگی صلاحیت بڑھانے پر توجہ مرکوز کرلی۔ 1965ء میں اس نے پاکستان پر جنگ مسلط کی تو امریکہ نے فوراً پاکستان کو ہتھیاروں کی فراہمی بند کردی۔ پاکستان اور بھارت کی جنگی مشینری میں واضح فرق تھا لیکن دوست ممالک کے تعاون اور جوانوں کی سرفروشی کے علاوہ برتر مہارت نے بھارت کے عزائم ناکام بنائے۔ اس جنگ کے بعد بھارت نے روایتی ہتھیاروں کی تیاری اور حصول کو تیز تر کردیا۔ 1971ء میں اس نے جنگ کے میدان کے بجائے سازشوں کا میدان چنا اور مشرقی پاکستان کو الگ کروا دیا۔ سقوط ڈھاکہ کے بعد بھارت نے اپنی جنگی صلاحیت مزید بڑھانا شروع کردی۔ ایٹمی صلاحیت کے حصول پر وہ 15اگست 1947ء سے کام کرتا آرہا ہے تھا چنانچہ 18مئی 1974ء کو اس نے راجھستان کے صحرا میں پہلا ایٹمی تجربہ کامیابی سے کیا۔ دوسری طرف اس نے سوویت یونین سے جدید جنگی طیاروں کا حصول جاری رکھا اور فضائیہ کو دنیا کی بڑی فضائی طاقتوں میں لاکھڑا کرنے میں کامیاب رہا۔ 1983ء میں اس نے سویت یونین کی مدد سے بیلسٹک میزائلوں کی تیاری بھی شروع کردی۔ 1988ء میں اس نے ”پرتھوی” میزائل کی آزمائشوں کا آغاز کیا۔ 80ء کی دہائی میں اس نے سوویت یونین سے تمام جدید لڑاکا طیارے حاصل کئے۔ پرتھوی بیلسٹک میزائل کے بعد بھارت نے اگنی دور مار میزائل بھی تیار کرلئے۔ 2005ء میں اس نے روس کے تعاون سے کروز میزائل ”براہموس” کے تجربات کا آغاز کردیا۔ 2005ء میں بھارت نے اپنی تاریخ کی سب سے بڑی جنگی پیشرفت کی۔ اس برس کے دوران اس نے میزائل تجربات، جنگی مشقوں اور ہتھیاروں کے حصول کے متعدد معاہدے کئے۔ 2006ء میں یہ سلسلہ مزید آگے بڑھا۔ اس برس امریکی صدر بش نے مارچ میں بھارت کا دورہ کیا اور جوہری تعاون کے معاہدے پر دستخط ہوئے۔ 2007ء میں روسی صدر ولادی میر پوٹن جنوری میں بھارتی یوم جمہوریہ کے موقع پر دہلی گئے اور بھارت کے ساتھ متعدد اہم سمجھوتے کئے۔ 2008ء میں بھارتی یوم جمہوریہ کی تقریبات کے موقع پر فرانس کے صدر نکولس سرکوزی نے مہمان خصوصی کے طور پر دہلی کا دورہ کیا اور متعدد دفاعی معاہدے کئے۔ سرکوزی نے 25جنوری کو پریس کانفرنس میں بھارت، فرانس جوہری معاہدے کا عندیہ دیا تھا جو حال ہی میں 30ستمبر کو پیرس میں طے پاگیا۔ فرانسیسی صدر کے دورہ میں بھارت نے آئندہ 5سال کے دوران فرانس سے 30 ارب ڈالر کا اسلحہ خریدنے کے معاہدے کئے تھے۔ فرانس کی طرف سے بھارت کو 40جدید لڑاکا طیارے”رافیل” فروخت کرنے کی پیشکش بھی ہوئی۔ 26فروری کو بھارت نے سمندر سے زمین پر مار کرنے والے ”ساگاریکا” بیلسٹک میزائل آب دوز سے لانچ کئے جانے کی صلاحیت سے لیس ہے۔ تجربے کے دوران یہ میزائل 50کلو میٹر گہرائی سے دغام گیا۔ اس پر 500 کلو گرام وزنی وار ہیڈ نصب کیا جاسکتا۔ 5 مارچ کو بھارت نے کروز میزائل ”براہموس” کے بحری ورژن کا تجربہ جزائر انڈیمان میں کیا جس میں اس میزائل کو سمندر سے خشکی پر فائر کیا گیا۔ 23مارچ کو اگنی 1ایٹمی میزائل کا تجربہ اڑیسہ میں ہوا جس کی حد ضرب 700 کلو میٹر اور 1ٹن وزنی ہتھیار اٹھانے کی صلاحیت ہے۔ یہ تجربہ راجھستان کے صحرا میں 20 مارچ سے جاری فوجی مشقوں کے دوران کیا گیا جو بھارتی تاریخ کی سب سے بڑی مشقیں تھیں۔ 59 ممالک کے سفارتکاروں اور فوجی اتاشیوں نے ان مشقوں کا مشاہدہ کیا۔ بھارت کے آرمی چیف جنرل دیپک کپور کے مطابق ان مشقوں کا مقصد جدید ہتھیاروں کی صلاحیت جانچنا تھا۔ پوکھران فیلڈ فائرنگ رینج میں ہونے والی مشقوں میں ٹی 90- ٹینک، طویل فاصلے تک مار کرنے والے میزائل، جاسوس طیاروں اور لڑاکا طیاروں کے علاوہ ائیر ڈیفنس گن سسٹم کا استعمال کیا گیا۔ 28اپریل کو بھارت نے اپنے خلائی پروگرام کو آگے بڑھاتے ہوئے 10 مواصلاتی سیارے خلاء میں روانہ کئے جن میں 8 غیر ملکی نینو سیارے بھی شامل تھے۔ بھارت کا کہنا تھا کہ اس نے اپنے خلائی پروگرام کی اہلیت ثابت کردی۔ 29 اپریل کو بھارتی وزیر دفاع اے کے انتھونی نے ایوان زیریں لوک سبھا میں بتایا کہ بھارت نے 51 میراج طیاروں کو اپ گریڈ کرنے کیلئے فرانس کی طیارہ ساز کمپنی کے ساتھ ایک ارب یورو کا معاہدہ کیا۔ 7مئی کو بھارت نے اگنی 3میزائل کا تجربہ کیا جس کی رینج ساڑھے تین ہزار کلو میٹر ہے اور بھارت اس میزائل کو بین البراعظمی میزائل کے طور پر اپ گریڈ کررہا ہے۔ 23 مئی کو بھارت نے پرتھوی میزائل کی آزمائش کی۔ 13اور 14 ستمبر کو بھارت نے فضاء سے فضاء میں مار کرنے والے ”آسٹرا” میزائل کے تجربات کئے جس کی رینج 25سے 40 کلو میٹر ہے۔
بھارت نے فضائیہ کے لئے اسرائیل سے سریع الحرکت جاسوس میزائل سسٹم خریدنے کا معاہدہ بھی کیا ہے زمین سے فضاء میں مارکرنے والے اسرائیلی ”باراک” میزائل سسٹم کی تیاری کیلئے بھی دونوں حکومتوں میں معاہدہ ہوا ہے۔
بھارت اپنے فضائی بیڑے کیلئے چوتھی نسل کے 230 روسی لڑاکا طیارے ایس یو 30 ایم کے آئی طیارے خریدنے کا معاہدہ بھی کرلیا ہے جو پہلے ہی اس کی فضائیہ کا حصہ ہیں۔ بھارت ایٹمی آب دوز کی تیاری پر بھی کام کررہا ہے جو وشاکاپٹنم کی بندرگاہ پر قائم خفیہ بحری مرکز میں جاری ہے۔ اس کے علاوہ روس کے ساتھ ایک خفیہ معاہدے کے تحت 65 کروڑ ڈالر کے عوض دسمبر 2009ء تک بھارت ایک ایٹمی آب دوز 10 سال کی لیز پر حاصل کریگا جسے کروز اور بیلسٹک میزائل اگنی 3سے لیس کیا جائیگا۔ ”پراجیکٹ ون” کے نام سے یہ معاہدہ جنوری 2004ء میں خفیہ طور پر طے پایا تھا۔