مہاجر کراچی کی شان ہیں ٗ تحریک انصاف

شمار ملک کے پڑھے لکھے اور باشعور طبقے میں ہوتا ہے ٗ اسد عمر
شناخت ٗ مطالبات اور حقوق کیلئے آواز بلند کرتے رہیں گے ٗ ممبر سازی کیمپ پر خطاب
کراچی(اسٹاف رپورٹر)پاکستان تحریک انصاف کے مرکزی سینئر رہنما و رکن قومی اسمبلی اسد عمر نے کہا ہے کہ اگر اردو بولنے والے اپنے آپ کو مہاجر کہلانا پسند کرتے ہیں تو ہماری زبان لڑکھڑانی نہیں چاہئے ۔ اگر میں اپنی شناخت مہاجر سے کروانا چاہتا ہوں تو میں اپنے آپ کو مہاجر ہی کہوں گا، کسی کو حق نہیں پہنچتا کہ میری شناخت پر انگلی اٹھائے۔ مہاجر طبقہ کراچی کی شان ہے۔ مہاجروں کی شناخت، مطالبات اور انکے حقوق کے لئے تحریک انصاف اسی طرح آواز بلند کرتی ہے جس طرح دیگر تمام پاکستان میں بسنے والی قومیتوں کے لئے کرتی ہے۔ مہاجر وں کا شمار ملک کے پڑھے لکھے اور باشعور طبقے میں ہوتا ہے۔ یہ باتیں انہوں نے تحریک انصاف کی جانب سے جاری رکنیت سازی مہم کے سلسلے میں نارتھ ناظم آباد کے علاقے حیدری میں لگائے گئے ممبر شپ کیمپ کے دورے کے موقع پر میڈیا اور کارکنان سے گفتگو کرتے ہوئے کہیں ۔ اسد عمر نے مزید کہا کہ مہاجر، پختون، سندھی، پنجابی، بلوچ اور دیگر تمام قوموں کی حق دلانے کی ذمہ داری ایک قومی پارٹی کی ہونی چاہئے اور وہ واحد قومی پارٹی جو ہر پاکستانی کے حقوق کی بات کرتی ہے وہ پارٹی صرف تحریک انصاف ہے۔ بد قسمتی سے آج تک ہمارے حکمران قوم پرستی کی آڑ میں اپنی سیاست چمکانے کے لئے ایک قوم کو دوسری قوم سے لڑواتے آئے ہیں۔ لیکن پاکستانی قوم کی خوش قسمتی ہے کہ پا کستان تحریک انصاف کے چیئرمین عمران خان نے پوری پاکستانی قوم کو تحریک انصاف کے جھنڈے تلے متحد کردیا ہے۔

وٹس ایپ کے ذریعے خبریں اپنے موبائل پر حاصل کرنے کے لیے کلک کریں

تمام خبریں اپنے ای میل میں حاصل کرنے کے لیے اپنا ای میل لکھیے

اپنا تبصرہ بھیجیں