لیاقت آباد میں پیپلزپارٹی کے جلسے میں شرکت کرنیوالوں کو دھمکیاں

جلسے میں شرکت کرنے والوں کو کچھ ہوا تو ذمہ داری ایم کیو ایم پر عائد ہوگی، رہنما پیپلزپارٹی سعید غنی کی پریس کانفرنس
ایم کیو ایم نے شہر میں لسانیت اور نفرت کی سیاست دوبارہ شروع کرکے الطاف حسین کی اولاد ہونے کا ثبوت دے دیا ہے
کراچی (اسٹاف رپورٹر) پیپلز پارٹی کراچی ڈویژن کے صدر و صوبائی وزیر سعید غنی نے کہا ہے کہ پیپلز پارٹی کے لیاقت آباد میں ہونے والے جلسے میں شرکت کرنے والوں کو دھمکیاں دی جارہی ہیں، اگر ان کو کچھ ہوا تو ذمہ داری ایم کیو ایم پر عائد ہوگی۔ شہر میں ایم کیو ایم نے لسانیت اور نفرت انگیز سیاست دوبارہ شروع کرکے الطاف حسین کی اولاد ہونے کا ثبوت دے دیا ہے، شہر میں بینرز اور ہینڈ بلز سے یہ ثابت ہوگیا ہے کہ ایم کیو ایم شہر میں دہشت گردی کی سیاست پر عمل پیرا ہے۔ ان خیالات کا اظہار انہوں نے جمعہ کی شب بلاول ہاؤس میڈیا سیل میں پریس کانفرنس سے خطاب کرتے ہوئے کیا۔ اس موقع پر پروفیسر این ڈی خان، وقار مہدی، راشد حسین ربانی، تاج حیدر، شہلا رضا، جاوید ناگوری ودیگر بھی موجود تھے۔ سعید غنی نے کہاکہ ایم کیو ایم نے 30 سالوں میں شہر کے ساتھ اتنا کچھ کرکے بھی ہوش کے ناخن نہیں لیے اور آج بھی نفرت کی سیاست پر عمل پیرا ہے، جبکہ پیپلز پارٹی شہر میں امن و محبت اور بھائی چارے کی جدوجہد پرگامزن ہے اور لسانیت کے خاتمے کے لیے ہرممکن اقدامات کر رہی ہے، کراچی میں 30 برسوں سے جو کچھ بھی ہوا اب نہیں ہونے دیں گے۔ ایم کیو ایم آج بھی لوگوں کو آپس میں لڑوانے کی کوشش کر رہی ہے انہوں نے کہاکہ پیپلز پارٹی لوگوں سے ووٹ مانگنے جارہی ہے ایم کیو ایم کی طرح چھیننے نہیں جارہی، وہ دن گئے جب بیلٹ بکس اور ٹھپہ مافیا کے ذریعہ الیکشن جیتا جاتا تھا، آج کراچی کے شہری اپنے حق رائے دہی استعمال کرنے کے لیے آزاد ہیں اب کسی کے دباؤ میں نہیں آئیں گے۔

وٹس ایپ کے ذریعے خبریں اپنے موبائل پر حاصل کرنے کے لیے کلک کریں

تمام خبریں اپنے ای میل میں حاصل کرنے کے لیے اپنا ای میل لکھیے

اپنا تبصرہ بھیجیں