ٹرین کے گارڈ محمد سعید کی مدعیت میں نامعلوم افراد کیخلاف مقدمہ درج کرلیا گیا ٗ آگ مبینہ طور پر تبلیغی جماعت کے مسافروں کا گیس سلنڈر پھٹنے سے ہوئی ٗ چیئرمین ریلوے
سلنڈر میری سیٹ کے سامنے ہی تھا ٗ پہلے ایک شخص نے سالن گرم کیا پھر چائے بنائی جب دوبارہ چائے بنانے لگا تو سلنڈر پھٹ گیا ٗ مسافرنے آنکھوں دیکھا حال بتادیا
کراچی (مانیٹرنگ ڈیسک)کراچی سے لاہور اور راولپنڈی جانے والی تیز گام ایکسپریس میں آتشزدگی کے واقعے میں جاں بحق ہونیوالے افراد کی تعداد80 تک پہنچ گئی ہے۔کئی زخمیوں کی حالت اب بھی تشویشناک ہے اور ہلاکتوں میں اضافے کا اندیشہ ظاہر کیا جارہا ہے۔حادثے میں 100 سے زائد زخمی ہوگئے ہیں جنہیں اسپتالوں میں طبی امداد دی جارہی ہے۔تفصیلات کے مطابق کراچی سے لاہور اور راولپنڈی جانے والی تیز گام ایکسپریس میںجمعرات کی صبح اچانک آگ بھڑک اٹھی تھی۔ حادثہ رحیم یار خان میں ٹانوری اسٹیشن چک نمبر 6 چنی گوٹھ کے قریب پیش آیا اور زیادہ تر جاں بحق افراد کا تعلق تبلیغی جماعت سے ہے جو اجتماع میں شرکت کے لیے رائیونڈ جارہے تھے۔آج صبح موصولہ اطلاعات کے مطابق حادثے میں زخمی ہونیوالے دو مزید افراد دم توڑ گئے۔ جس کے بعد جاں بحق ہونیوالوں کی تعداد 80 تک پہنچ گئی ہے۔ٹرین سانحے کی تحقیقات شروع کردی گئی ہے۔ چیئرمین ریلوے سکندر سلطان کے مطابق گریڈ 21 کے وفاقی انسپکٹر دوست علی لغاری کو تحقیقاتی آفیسر مقرر کردیا گیا ہے جو جائے حادثہ پر تمام شواہد اکٹھے کرکے وزیراعظم کو رپورٹ پیش کریں گے۔ چیئرمین ریلوے نے بتایا کہ تحقیقات کے لیے دیگر افسران کو بھی جائے حادثہ پر روانہ کردیا گیا ہے۔ حادثے کا شکار اکانومی کلاس کی دو بوگیاں امیر حسین اینڈ جماعت کے نام سے بک کی گئی تھیں۔ریسکیو اہلکاروں کی جانب سے امدادی آپریشن کیا گیا جس میں پاک فوج کے دستے بھی شریک تھے جبکہ خان پور، لیاقت پور اور ریلوے پولیس بھی موقع پر پہنچ گئی۔آگ ٹرین کی اکانومی کلاس میں گیس سلنڈر پھٹنے سے لگی جب کہ مسافروں نے ٹرین سے کود کر جانیں بچائیں۔حکام کے مطابق مسافر ٹرین میں آگ لگنے کے افسوس ناک حادثے کے بعد ضلع بھر کے اسپتالوں میں ایمرجنسی نافذ کر دی گئی۔ ریسکیو 1122، پولیس، فائر بریگیڈ، سمیت دیگر امدادی ٹیموں نے موقع پر پہنچ کر ریسکیو آپریشن شروع کر دیا جب کہ حادثے میں متاثرہ زخمیوں کو ٹی ایچ کیو لیاقت پور، آر ایچ سی چنی گوٹھ اور بہاولپور وکٹوریہ اسپتال منتقل کیا گیا۔ریلوے انتظامیہ حادثہ میں جاں بحق افراد کے لواحقین کو انشورنس کی مد میں 15 لاکھ روپے دے گی جبکہ زخمی ہونے والوں کو 50 ہزار روپے سے 3 لاکھ روپے تک دئیے جائیں گے۔
