حکومت، پیپلز پارٹی نے فلور کراسنگ پر ایس سی بی اے کی نظرثانی درخواست کی حمایت کردی

اسلام آباد: وفاقی حکومت اور پاکستان پیپلز پارٹی (پی پی پی) نے سپریم کورٹ بار ایسوسی ایشن (ایس سی بی اے) کی آئین کے آرٹیکل 63-اے پر سپریم کورٹ کے مئی 2022 کے فیصلے کے خلاف نظرثانی درخواست کی حمایت کر دی ہے۔

سپریم کورٹ نے اس فیصلے میں کہا تھا کہ کسی پارلیمانی جماعت کے منحرف اراکین اپنی جماعت کی ہدایات کے خلاف ووٹ نہیں ڈال سکتے۔ یہ پیشرفت اس وقت سامنے آئی ہے جب چیف جسٹس قاضی فائز عیسیٰ کی سربراہی میں سپریم کورٹ کا ایک بڑا بینچ اس درخواست کی سماعت کر رہا تھا۔

اس نئے بینچ میں جسٹس امین الدین خان، جسٹس جمال خان مندوخیل، جسٹس مظہر عالم خان میاں خیل اور جسٹس نعیم اختر افغان شامل ہیں۔

موجودہ بینچ اس وقت تشکیل دیا گیا جب جسٹس منیب اختر نے بینچ کا حصہ بننے سے معذرت کر لی، جس کی وجوہات انہوں نے سپریم کورٹ کے رجسٹرار کو مختلف خطوط کے ذریعے بیان کیں۔

ایک دن قبل، چیف جسٹس عیسیٰ نے جسٹس منیب کی غیر موجودگی کے باعث سماعت ملتوی کرتے ہوئے کہا تھا کہ انہیں بینچ میں دوبارہ شامل ہونے کی درخواست کی جائے گی، ورنہ بینچ دوبارہ تشکیل دیا جائے گا۔

اپنی غیر موجودگی کی وضاحت کرتے ہوئے جسٹس منیب نے کہا کہ انہوں نے بینچ سے علیحدگی اختیار نہیں کی، بلکہ وہ اس بینچ کا حصہ نہیں بن سکتے جو پریکٹس اینڈ پروسیجر کمیٹی نے تشکیل دیا ہو۔ یہ تین رکنی ججز کمیٹی سپریم کورٹ کے بینچوں کی تشکیل اور انسانی حقوق کے مقدمات سے متعلق فیصلے کرتی ہے۔