اسلام آباد میں وزیراعظم شہباز شریف کی زیر صدارت ہونے والے وفاقی کابینہ کے اجلاس میں امریکا اور ایران کے درمیان جنگ بندی میں پاکستان کے کردار کو سراہتے ہوئے آئندہ جمعہ کو یوم تشکر منانے کا فیصلہ کیا گیا ہے۔
ذرائع کے مطابق اجلاس میں وزیراعظم نے کابینہ ارکان کو امریکا ایران کشیدگی میں پاکستان کی سفارتی کوششوں اور حالیہ پیشرفت پر تفصیلی بریفنگ دی اور بتایا کہ کس طرح پاکستان نے دونوں ممالک کے درمیان مذاکراتی عمل میں اہم کردار ادا کیا۔
اجلاس کے دوران وزیراعظم شہباز شریف نے ثالثی کے عمل میں کردار ادا کرنے پر فیلڈ مارشل عاصم منیر اور نائب وزیراعظم اسحاق ڈار کا خصوصی ذکر کیا اور ان کی کوششوں کو خراج تحسین پیش کیا گیا۔ ذرائع کا کہنا ہے کہ کابینہ ارکان نے بھی اس پیشرفت کو پاکستان کیلئے بڑی سفارتی کامیابی قرار دیا۔
حکومتی فیصلے کے مطابق یوم تشکر منانے کا مقصد اس سفارتی کامیابی پر قوم کی سطح پر اظہارِ تشکر کرنا اور اس بات کو اجاگر کرنا ہے کہ پاکستان نے خطے میں امن کے قیام کیلئے مؤثر کردار ادا کیا ہے۔
