راولپنڈی:عوامی مسلم لیگ کے سربراہ اور سابق وزیر داخلہ شیخ رشید احمد نے کہا ہے کہ مہنگائی کی وجہ سے مزیدڈیڑھ کروڑلوگ خط غربت سے نیچے چلے گئے اقتصادی صورتحال انتہائی نازک ہوگئی ہے،گینگ آف تھری زرداری،نواز،فضل الرحمان الیکشن نہیں روک سکتے،نہ باہرسے امدادآئی،نہ اندرسے مددملی ہے ۔
شیخ رشید احمد نے ہفتہ کے روز ٹوئٹر پر جاری اپنے بیان اور ایک نجی ٹی وی سے انٹرویو میں کہا کہ کہ میں نے بہت پہلے کہا تھا کہ ستمبر ستمگر ہو گا ، آئندہ 15دن بڑے اہم ہیں، میں نے اب 15اکتوبر تک کی تاریخ دی ہوئی ہے۔
پی ڈی ایم کرپشن بچاؤ کےبعدسیاست بچاؤمہم پرہے6ماہ میں معیشت نہیں سدھری،برآمدات نہیں بڑھیں،مہنگائی اورڈالرنہیں رکا۔مزیدڈیڑھ کروڑلوگ خط غربت سےنیچےچلے گئےاقتصادی صورتحال انتہائی نازک ہوگئی ہے۔گینگ آف تھری زرداری،نواز،فضل الرحمان الیکشن نہیں روک سکتے۔نہ باہرسےامدادآئی،نہ اندرسےمددملی
— Sheikh Rashid Ahmed (@ShkhRasheed) September 17, 2022
انہوں نے کہا کہ میں نے 45دن دیئے تھے جن میں سے 15گزر گئے ہیں اور ممکن ہے کہ آئندہ 15دنوں میں کوئی پس پردہ مفاہمتی فارمولابھی کا میاب ہو جائے، اگر وہ ناکام ہوگیا تو پھر عمران خان کال دے گا اورعمران خان کی کوشش ہو گی کہ حالات جوڈوکراٹے کی طرف نہ جائیں اورالیکشن کی طرف جائیں اوراِس کے لئے اُس کی کوشش جاری ہے۔
شیخ رشید احمد نے کہا کہ اگر کوئی تعیناتی کا مسئلہ ہے تو وہ اصل میں اب پاکستان پیپلز پارٹی اور شہباز شریف کے درمیان ہے۔ایک سوال پر شیخ رشید نے کہا کہ میں کبھی فوجی معاملات پر بات نہیں کرتا ، میں ایک سیٹ کی سیاست کرتا ہوں، آئندہ 30دنوں پتا لگ جائے گا کہ سیاست کا اونٹ کس کروٹ بیٹھے گا۔
ایک سوال پر انہوں نے کہا کہ پہلے بھی مجھ پرتین خود کُش حملے ہو چکے ہیں اور عمران خان اس وقت بین الاقوامی سطح پر بھی ملکی سطح پر بھی نشانے پر ہیں اور کچھ مذہبی انتہا پسند بھی اُن کی جان کے پیچھے ہیں اور میری جان کے پیچھے بھی لوگ پڑے ہوئے ہیں لیکن اللہ بہت بڑا ہے، جو رات قبر میں ہے وہ باہر نہیں ہوسکتی جو باہر ہے وہ قبر میں نہیں ہوسکتی ، یہ مسلمان کا ایمان ہونا چاہیے کہ زندگی، موت، عزت،ذلت، ترقی، تنزلی، اُتار، چڑھائو، بیماری اور صحت یہ سب اللہ تعالیٰ کے پاس ہے۔