کینبرا میں آسٹریلوی وزیراعظم نے سڈنی میں پیش آنے والے فائرنگ کے واقعے کے بعد ہتھیاروں سے متعلق قوانین سخت کرنے اور دیگر اہم اقدامات اٹھانے کا اعلان کر دیا ہے۔
وزیراعظم کا کہنا ہے کہ عوامی تحفظ کو یقینی بنانے کے لیے گن لائسنس کو تاحیات رکھنے کی اجازت نہیں دی جا سکتی۔
سڈنی کے علاقے بونڈی بیچ پر گزشتہ روز دو افراد نے شہریوں پر اندھا دھند فائرنگ کی، جس کے نتیجے میں 15 افراد جان سے گئے جبکہ تقریباً 40 افراد زخمی ہوئے۔ واقعے کے بعد ملک بھر میں شدید تشویش پائی جا رہی ہے۔
آسٹریلوی وزیراعظم انتھونی البانیز نے کہا کہ حملہ آوروں میں سے ایک کے پاس چھ ہتھیار رکھنے کا لائسنس موجود تھا، جو موجودہ قوانین پر سنجیدہ سوالات اٹھاتا ہے۔ انہوں نے واضح کیا کہ حکومت ہتھیاروں کے قوانین میں سختی سمیت ہر ضروری قدم اٹھانے کے لیے تیار ہے۔
سڈنی حملے سے متعلق آسٹریلوی وزیر داخلہ نے بتایا کہ حملے میں ملوث شخص اسٹوڈنٹ ویزا پر آسٹریلیا آیا تھا جبکہ اس کا بیٹا آسٹریلیا میں ہی پیدا ہوا۔ واقعے پر ملک بھر میں ایک روزہ سوگ کا اعلان کیا گیا ہے، جس کے دوران قومی پرچم سرنگوں رہے گا۔