سیول (انٹرنیشنل ڈیسک) پلاسٹک کی آلودگی کی روک تھام کے لیے عالمی معاہدے پر بات چیت کرنے والے ممالک معاہدے پر پہنچنے میں ناکام ہوگئے۔ جنوبی کوریا کے شہر بوسان میں قانونی طور پر پابند عالمی معاہدے کے لیے اقوام متحدہ کی بین الحکومتی مذاکراتی کمیٹی کا پانچواں اجلاس آخری اجلاس ہونا تھا، تاہم اجلاس میں شریک ممالک معاہدے کے بنیادی دائرہ کار سے بہت دور رہے اور صرف اہم فیصلوں کو مستقبل کے اجلاس تک ملتوی کرنے پر اتفاق کر سکے۔ اجلاس کے چیئرمین لوئس ویاس والڈیویسو نے کہا کہ اگرچہ میں نے بہت سے شعبوں میں یکسانیت کے مضامین دیکھے ہیں لیکن کچھ دیگر شعبوں میں موقف مختلف ہے۔ سب سے زیادہ تقسیم کرنے والے مسائل میں پلاسٹک کی پیداوار کو محدود کرنا، پلاسٹک کی مصنوعات اور کیمیکلز کا انتظام کرنا اور ترقی پذیر ممالک کو معاہدے پر عمل میں مدد کرنے کے لیے مالی اعانت شامل ہے۔ اجلاس کے دوران پاناما کی جانب سے پیش کردہ تجویز کو 100 سے زائد ممالک کی حمایت حاصل تھی، جو عالمی سطح پر پلاسٹک کی پیداوار میں کمی کے ہدف کے لیے راہ ہموار کر سکتی تھی۔ روانڈا میں ماحولیات کی انتظامی اتھارٹی کی ڈائریکٹر جنرل جولیٹ کیبارا نے کہا کہ ایسا معاہدہ جو صرف رضاکارانہ اقدامات پر مبنی ہو، قابل قبول نہیں ہوگا۔ وقت آگیا ہے کہ ہم اسے سنجیدگی سے لیں اور ایک ایسے معاہدے پر بات چیت کریں جو مقصد کے لیے موزوں ہو اور ناکام ہونے کے لیے نہ بنایا جائے۔ ذرائع ابلاغ کے مطابق سعودی عرب جیسے پیٹروکیمیکل پیدا کرنے والے ممالک کی مختصر تعداد نے پلاسٹک کی پیداوار کو کم کرنے کی کوششوں کی سخت مخالفت کی اور مذاکرات کو موخر کرنے کے لیے طریقہ کار کے ہتھکنڈے استعمال کرنے کی کوشش کی ۔ واضح رہے کہ چین، امریکا، بھارت، جنوبی کوریا اور سعودی عرب 2023 ء میں پولیمر (پلاسٹک) پیدا کرنے والے سرفہرست پانچ ممالک تھے۔