امریکا میں بے روزگاری الاؤنس کے لیے نئی درخواستوں میں توقعات کے برعکس کمی ریکارڈ کی گئی ہے، جسے لیبر مارکیٹ کے لیے وقتی طور پر مثبت اشارہ قرار دیا جا رہا ہے۔
تاہم ماہرین کا کہنا ہے کہ مجموعی طور پر ملازمتوں کی رفتار سست ہونے کے باعث دسمبر میں بے روزگاری کی شرح میں نمایاں کمی کا امکان کم ہے۔
امریکی محکمہ محنت کے مطابق 20 دسمبر کو ختم ہونے والے ہفتے کے دوران بے روزگاری الاؤنس کے لیے جمع کرائی جانے والی نئی درخواستوں کی تعداد میں 10 ہزار کی کمی ہوئی۔ تازہ اعداد و شمار کے مطابق درخواستوں کی مجموعی تعداد کم ہو کر 2 لاکھ 14 ہزار رہ گئی۔
اس سے قبل ماہرین اور تجزیہ کاروں کی جانب سے اندازہ لگایا جا رہا تھا کہ اس مدت میں بے روزگاری الاؤنس کے لیے درخواستیں 2 لاکھ 24 ہزار تک پہنچ سکتی ہیں۔ توقع سے کم درخواستوں کو لیبر مارکیٹ میں استحکام کی علامت قرار دیا جا رہا ہے۔
ماہرین کا کہنا ہے کہ اگرچہ نئی درخواستوں میں کمی آئی ہے، مگر کمپنیوں کی جانب سے نئی بھرتیوں میں سست روی برقرار ہے۔ اسی وجہ سے خدشہ ظاہر کیا جا رہا ہے کہ سال کے اختتام پر مجموعی بے روزگاری کی شرح بلند رہ سکتی ہے۔
واضح رہے کہ کرسمس کی تعطیلات کے باعث یہ رپورٹ معمول کے شیڈول سے ایک دن پہلے جاری کی گئی، جس کے سبب اعداد و شمار میں محدود اتار چڑھاؤ بھی دیکھنے میں آ سکتا ہے۔ تجزیہ کار آئندہ ہفتوں کے ڈیٹا کو زیادہ اہم قرار دے رہے ہیں۔