وفاقی تحقیقاتی ادارے نے بڑی کارروائی کرتے ہوئے غیر قانونی مالی لین دین اور حوالہ ہنڈی کے ذریعے اربوں روپے بیرونِ ملک منتقل کرنے والے نیٹ ورک کے خلاف اہم کامیابی حاصل کی ہے، جس کے دوران چار ملزمان کو حراست میں لے لیا گیا ہے۔
ترجمان کے مطابق یہ کارروائی ایف آئی اے کے کمرشل بینکنگ سرکل نے کراچی کے علاقے خالد بن ولید روڈ پر کی، جہاں خفیہ اطلاع پر منظم انداز میں سرگرم ایک گروہ کو نشانہ بنایا گیا جو طویل عرصے سے غیر قانونی مالی سرگرمیوں میں ملوث تھا۔
تحقیقات کے مطابق گرفتار کیے گئے افراد ایک ایسے نیٹ ورک کا حصہ ہیں جس کے روابط بیرونِ ملک متعدد ممالک تک پھیلے ہوئے ہیں، جن میں ملائیشیا، جنوبی افریقہ، ترکیہ اور دیگر ریاستیں شامل ہیں، یہ گروہ منظم طریقے سے رقوم کی غیر قانونی ترسیل میں ملوث رہا ہے۔
ایف آئی اے کے مطابق ابتدائی شواہد سے معلوم ہوا ہے کہ ملزمان نے حوالہ ہنڈی کے غیر قانونی طریقہ کار کے ذریعے ایک ارب روپے سے زائد کی خطیر رقم بیرونِ ملک منتقل کی۔ اس نیٹ ورک کے ذریعے مالی لین دین کو خفیہ رکھتے ہوئے مختلف چینلز استعمال کیے جاتے تھے تاکہ قانونی نگرانی سے بچا جا سکے۔
ترجمان نے مزید بتایا کہ کارروائی کے دوران ملزمان کے قبضے سے غیر ملکی کرنسی بھی برآمد کی گئی ہے، جس کی نوعیت اور مقدار کا جائزہ لیا جا رہا ہے، گرفتار افراد سے مزید تفتیش جاری ہے تاکہ اس نیٹ ورک کے دیگر سہولت کاروں اور بیرونِ ملک روابط کو بے نقاب کیا جا سکے۔
ذرائع کا کہنا ہے کہ ایف آئی اے اس معاملے کو منی لانڈرنگ اور غیر قانونی مالیاتی نیٹ ورک کے وسیع تناظر میں دیکھ رہی ہے، جبکہ مزید گرفتاریاں بھی متوقع ہیں۔