سرینگر:اکتوبر اس سال جموں و کشمیر کے لیے سب سے مہلک مہینہ ثابت ہوا جس میں 44 اموات ہوئیں، جن میں 19 حریت پسند، 13 عام شہری اور 12 مسلح افواج کے اہلکار شامل تھے۔
اس ماہ متعدد محاذوں پر تشدد میں اضافہ ہوا۔ کم از کم چھ دستی بم حملوں، چار آئی ای ڈیز کی برآمدگی، دو پٹرول بم پھینکے جانے اور 11 شہریوں کے خلاف ٹارگٹڈ حملوں ،جن میں پانچ غیر مقامی مزدور اور اقلیتی برادریوں کے تین افراد شامل ہیں، نے ‘بگڑتے ہوئے حالات میں اضافہ کیا۔
ایک شہری مبینہ طور پر سی آر پی ایف سیکورٹی چیک پوسٹ پر اور دوسرا سی آر پی ایف کیمپ کے قریب شہید کیا گیا ۔رواں ماہ مزید دو غیر مقامی مزدور پراسرار حالات میں مردہ پائے گئے۔
ان اموات کی وجہ سے وادی سے غیر مقامی لوگوں کی نقل مکانی شروع کی، ان میں سے تقریبا 10,000 پہلے دو ہفتوں کے اندر ہی علاقہ چھوڑ کرچلے گئے۔ اسی عرصے میں 350 سے زائد مہاجر خاندانوں نے فوری طور پر کشمیر چھوڑ دیا۔ شہری اموات کے تناظر میں، افواج نے پوری وادی میں بڑے پیمانے پر کریک ڈان شروع کیا، اور14 مقابلوں میں 19 حریت پسندوں کو شہید کیا۔ انہوں نے حریت پسندوں کے مبینہ ہمدردوں کے خلاف بھی بڑے پیمانے پر کریک ڈان شروع کیا، اورسینکڑوں نوجوانوں کو گرفتار اور حراست میں لیا۔
ایک سینئر عہدیدار نے ساوتھ ایشین وائر کو بتایااکتوبر میں عسکریت پسندوں کے حملوں میں اضافہ ہوا ہے اور سری نگر میں تشدد کے کم از کم 10 واقعات رونما ہوئے ہیں۔ زمینی صورتحال میں اچانک تبدیلی آئی ہے۔
ایک اور اہلکار نے کہا، "واقعات کی تعداد، اثرات اور وسعت کو دیکھتے ہوئے یہ 5 اگست 2019 کے بعد سب سے زیادہ پرتشدد مہینہ رہا ہے۔
ساوتھ ایشین وائر کے مطابق نیشنل انویسٹی گیشن ایجنسی نے بھی صورتحال پر قابو پانے کے لیے 10 اکتوبر کو کئی افراد کے خلاف مقدمہ درج کیا۔ انہوں نے اکتوبر میں جموں و کشمیر میں 40 سے زیادہ مقامات پر چھاپے مارے اور باضابطہ طور پر 25 افراد کو گرفتار کیا۔
جموں و کشمیر پولیس نے کئی نوجوانوں کو مقدمات میں مبینہ طور پر ملوث ہونے کے الزام میں گرفتار بھی کیا۔ انتظامیہ نے پبلک سیفٹی ایکٹ کے تحت مارے گئے کم از کم 48 قیدیوں کو گزشتہ ماہ آگرہ کی ہائی سکیورٹی جیل میں منتقل کیا۔ اکتوبر کے آخری ہفتے میں، پولیس نے سری نگر کے دو میڈیکل کالجز کے طلبا کے خلاف بھی مبینہ طور پر جاری ٹی ٹوئنٹی ورلڈ کپ میں پاکستان کرکٹ ٹیم کی ہندوستانی ٹیم کے خلاف جیت کا جشن منانے کے الزام میں دو مقدمات درج کیے ۔
دریں اثنا، جموں کے راجوری پونچھ رینج کے جنگلات میں آپریشن 20ویں دن میں داخل ہو گیا۔ آپریشن میں اب تک دو جونیئر کمیشنڈ افسران سمیت نو فوجی مارے جا چکے ہیں۔ ایل او سی کے قریب راجوری میں ہفتہ کو مسلح افواج کے دو اہلکار اس وقت مارے گئے جب وہ گشت پر تھے بارودی سرنگ کے دھماکے میں۔
جموں و کشمیر پولیس کے سربراہ دلباغ سنگھ نے اتوار کو کہا کہ گزشتہ چند ہفتوں میں بڑھتی ہوئی تیزی کے بعد حالات معمول پر آ رہے ہیں۔ سنگھ نے کہا، "لوگ امن اور ترقی کی طرف بڑھنا چاہتے ہیں اور وہ تشدد کے خلاف ہیں۔ چند پرتشدد واقعات ہوئے تھے۔ اب صورتحال بہتر ہے۔