حافظ محمد ہارون عباس
ذات پات کو ہندو معاشرے کا بنیادی عنصر سمجھا جاتا ہے۔ اس میں اچھوت طبقاتی درجہ بندی کے عدم مساوات کے ڈھانچے میں سب سے نچلی سطح پر ہیں ،1935 سے پہلے ، اچھوتوں اور پسماندہ ذاتوں کی ایک لمبی فہرست تھی ، لیکن اس وقت ، شودر اور اچھوت سمجھی جانے والی ذاتوں میں ، اونچی ذات کے ہندو کہلانے کا جذبہ تھا۔ چنانچہ ہر ذات نے برہمن/ٹھاکر ہونے کا دعوی کیا۔ اورکانگریس اور دیگر ہندو سیاسی و سماجی جماعتوں نے اچھوتوں اور پسماندہ ذاتوں کی اس کمزوری سے بھرپور فائدہ اٹھایا۔ان کی دلچسپی یہ تھی کہ دلتوں کی تعداد زیادہ ظاہر نہ ہو اور ہندوں کی آبادی کم نہ ہو۔
برطانوی حکومت نے اچھوت سے پیدا ہونے والی مشکلات کو بنیاد بنا کرایک نئی فہرست تشکیل دی جسے شیڈولڈ کاسٹ آرڈر کہا گیا۔ اس میں 429 ذاتیں شامل تھیں۔ اس پرمغربی اتر پردیش کی جاٹ ذات کے رہنماوں نے کئی مقامات پر اجلاس منعقد کئے اور شیڈولڈ کاسٹ میں شامل کرنے کے خلاف احتجاج کیا کیونکہ آریہ سماج کے کچھ رہنماوں نے دعوی کیا کہ وہ کرشنا کی اولاد اور راجپوت ہیں، انہیں چماروں کی فہرست میں شامل نہ کیا جائے۔ کچھ اضلاع میں ‘جاٹوں ‘کے نام فہرست سے حذف کر دئے گئے۔ ‘دھنوکوں’ نے بھی اسی طرح احتجاج کیا۔ جس کے نتیجے میں کچھ ریاستوں میں ان کا نام بھی فہرست سے نکال دیا گیا۔ ‘دھوبی ‘ذات کے لوگوں کے ساتھ بھی ایسا ہی ہوا۔ ہماچل میں ‘کولی ‘”چھوٹے راجپوت” بننے کی کوشش کر رہے تھے کیونکہ وہ آریہ سماج سے بہت زیادہ متاثر تھے۔
1930-35 کے بعدبھی کئی ذاتیں پسماندہ طبقات کی فہرست سے خارج ہونا چاہتی تھیں ۔
1949 میں بھارت میں ایک نیا آئین تشکیل گیا جو 26نومبر سے نافذ ہوا۔ نئے آئین میں ذاتوں کی ایک علیحدہ فہرست بھی شامل کی گئی جو پرانے آئین سے کہیں زیادہ طویل تھی۔ اس میں 900 سے زائد ذاتیں شامل کی گئیں۔ نئے آئین میں آرٹیکل 341 کے تحت صدر کو فہرست میں درج ذاتوں کی وضاحت اور پارلیمنٹ کو کسی بھی ذات کا نام شامل کرنے یا حذف کرنے کا اختیار دیا گیا ۔ اب پارلیمنٹ فیصلہ کرتی ہے کہ کسے شیڈولڈ سمجھا جائے اور کس کو نہیں۔
اس فہرست میں درج ذاتوں کی شناخت کی حیثیت کا تعین صرف پارلیمنٹ یا سپریم کورٹ پر منحصر ہے۔ اگر ان کے نام فہرست سے نکال دیے جائیں تو وہ قانون کی نظر میں اچھوت نہیں رہیں گے۔
ہندوستانی قانون دان، سیاسی رہنمااورفلسفی، بھیم را رام جی امبیدکر جنہیں بابا صاحب کے نام سے بھی جانا جاتا ہے، نے پورے ہندوستان کے دلتوں کو متحد کرنے کے لیے بہت کوششیں کیں۔ پہلی کوشش 1927 میں ایک عوامی تحریک کی شکل میں مہاراشٹر کے چودھر تالاب سے پانی کے حصول کے لیے کی گئی ۔ جدوجہد میں ،’ مہروں’ کے علاوہ ، بہت سی دوسری اچھوت ذاتوں نے تعاون کیا ، لیکن اس تحریک کے بعد انسانی اور شہری حقوق کے لیے کوئی دوسری تحریک شروع نہیں کی گئی۔ اپنے مقصد کے حصول کے لیے ڈاکٹر امبیدکر نے تعلیم اور سیاسی حقوق کے فروغ کے لیے جدوجہد جاری رکھی اور کامیابی حاصل کی۔
دوسری کوشش ایک سیاسی جماعت بنانے کی تھی۔ پہلی سیاسی جماعت انڈیپنڈنٹ لیبر پارٹی کا قیام 1936 میں عمل میں لایا گیا۔اس کا مقصد محنت کش طبقے کی سماجی حیثیت کو بلند کرنا تھا۔ اس میں مہر ، چمار ، مانگ ، مہتر وغیرہ جیسی ذاتوں کے علاوہ اونچی ذات کے ہندو بھی ایم ایل اے بنے لیکن اس پارٹی کا دائرہ عمل صرف بمبئی صوبے تک محدود رہا۔
دوسری کوشش 1942 میں کی گئی جب اچھوتوں کی تاریخ میں پہلی بار اچھوتوں کی ایک آزاد جماعت قائم ہوئی۔ اس پارٹی کا نام شیڈولڈ کاسٹس فیڈریشن رکھا گیا۔ کئی اچھوت ذاتوں کے لوگ اس پارٹی میں شامل ہوئے ۔ لیکن یہ تنظیم صرف سیاسی فوائد کے حصول تک محدود رہی۔ اس کی بنیاد کمزور تھی۔ سب سے بڑی کمزوری اچھوتوں کا ذات پات کا نظام تھا۔ چمار ، کھٹک ، بھنگی ، مہتر ، دھوبی ، مالا ، مدیگا وغیرہ جیسی ذاتیں صرف مختلف پیشوں کی بنیاد پر بنائی گئیں ، لیکن ہندو مذہب کی تعلیمات اور اس کے گہرے اثرات کی وجہ سے وہ ایک دوسرے کو اونچا اور نیچا سمجھنا شروع ہو گئے۔
ایسے حالات میں تنظیم کا آگے بڑھنا ممکن نہیں تھا۔ یہی وجہ ہے کہ جب بھی ان پسماندہ ذات پرمظالم ہوتے ہیں تو وہ نہ تو لڑ سکتے ہیں اور نہ ہی متحد ہو کر ایک دوسرے کی مدد کر سکتے ہیں۔
بھارت میں ذات پات کے اثرات اس حد تک مضبوط ہیں کہ اگر ایک ذات کے لوگ ایک مذہب کو قبول کرلیں تو دوسرے مذہب کے لوگ اس مذہب سے فاصلہ اختیار کر لیں گے۔ اگر ایک ذات کے لوگ کسی پارٹی میں شمولیت اختیار کر لیں تو دوسری ذات کے لوگ اس سے دور رہیں گے۔ یہاں تک کہ پارٹی کے اندر ، عہدوں اور ٹکٹوں کی تقسیم کے دوران ذات کا خیال رکھا جاتا ہے۔ اس کی وجہ سے ہر سیاسی جماعت ایک ذات کی پارٹی بن جاتی ہے جیسے مہاراشٹر میں ریپبلکن پارٹی یا شمالی ہندوستان میں بہوجن سماج پارٹی۔ ذات پات کی بنیاد پر کئی پارٹیاں وجود میں آئیں لیکن وہ اچھی تنظیم نہیں بن سکیں۔
ڈاکٹر امبیدکر نے ‘مذہب کی تبدیلی’ کی تیسری تحریک چلائی ، لیکن اس تحریک کے آغاز کے 53 دن بعددن ان کا انتقال ہو گیا۔ مذہب کی تبدیلی کی تحریک جو کہ ذات پات کے نظام کو توڑ سکتی تھی اور ایک نیا قابل شناخت یونٹ تشکیل دے سکتی تھی ،عملی شکل اختیار نہیں کر سکی۔
ڈاکٹر امبیدکر نے اپنے کروڑوں اچھوتوں کے اسلام قبول کرنے کا عندیا دیاتھا جس پر گاندھی، کانگریس اور انگریز نے حیلے بہانے، دھمکی، دباو اور لالچ کے ذریعے ڈاکٹر امبیدکر کو اسلام قبول کرنے سے روکے رکھا۔ ڈاکٹر امبیدکر ہندوستانی سیاست میں مسلمانوں کی اہمیت اور حیثیت کو بخوبی جانتے اور مانتے تھے۔بیشتر سیاسی رہنما جو اس تحریک کی قیادت میں تھے ، وہ مذہبی تبدیلی کی تحریک کو صحیح سمت نہیں دے سکے۔
اس حقیقت کے باوجود کہ ڈاکٹر امبیدکر نے تمام اچھوتوں کی بیداری اور ترقی کے لیے کام کیا، ان کے پیروکار کم تھے۔ زیادہ تر لوگوں نے اپنے مفادات کو ترجیح دی لیکن ان کی تعلیم کو قبول نہیں کیا۔ وہ ہندو مذہب اور ذات پات کے نظام کی غلامی سے آزاد نہیں ہونا چاہتے تھے۔ جو اس خطے میں صدیوں سے چلا آرہا تھا۔ بابری مسجد کے انہدام کے بعد بی جے پی کے وزرا ، اراکین پارلیمنٹ اور پسماندہ ذاتوں کے ایم ایل ایزکی تقریریں اس کا واضح ثبوت ہیں۔
آج پورے ہندوستان میں دلتوں پر مظالم بڑھ رہے ہیں ، ایک طرف ریزرویشن کی مخالفت بڑھ رہی ہے، نجکاری کے ذریعے ترقی کے دروازے بند ہو رہے ہیں ، دوسری طرف دلت کسی ایک علاقے میں منظم نہیں ہیں۔ وہ نوجوان جو سیاست کو اپنا کیرئیر بنانا چاہتے ہیں ، وہ سمجھتے ہیں کہ سیاست کا مقصدسیاست نہیں بلکہ پارلیمنٹ اور ودھان سبھا تک رسائی ہے۔ جدوجہد ، قربانی اور عوامی تحریک کا مشکل راستہ اختیار کرنے کے بجائے ، وہ ایسی جماعتوں میں شامل ہو جاتے ہیں جن کی انتخابات میں کامیابی کی زیادہ امید ہوتی ہے یا جو پارٹی انہیں زیادہ پیسے دے سکتی ہے۔ وہ پارلیمنٹ اور قانون ساز اسمبلی میں اپنے آقاوں کے زیادہ وفادار ہیں۔
ذات پات کے احساس کی وجہ سے اچھوت منظم نہیں ہو سکے۔ انہیں ذات سے اتنا پیار ہے کہ وہ بیرون ملک جانے کے بعد بھی اس سحرمیں گرفتار رہتے ہیں۔ اس اونچ نیچ کی وجہ سے ان کی تنظیم ممکن نہیں ہے۔
آج کے مروجہ قوانین اور طریقوں کو دیکھتے ہوئے اس بات کا قطعاًامکان نہیں ہے کہ وہ کبھی انتخابات کے ذریعے سیاسی طاقت حاصل کر سکیں گے۔
کچھ لوگوں نے ریزرویشن سے فائدہ اٹھایا ہے لیکن ریزرویشن سے فائدہ اٹھانے والوں میں سے بہت کم لوگوں نے معاشرے کے لئے کام کیا ہے لیکن ریزرویشن کوئی مستقل چیز نہیں ہے۔ اگر پڑھے لکھے لوگوں کی تعداد بڑھتی ہے اور پڑھے لکھے نوجوانوں میں بے روزگاری بڑھتی ہے تو ریزرویشن کا نظام بے کار ہو جائے گا۔
جو لوگ ہندو مذہب اور ورنا نظام کو مثالی سمجھتے ہیں وہ ہر روز طاقتور ہوتے جا رہے ہیں۔ وہ رام راجیا (ہندوریاست) قائم کرنا چاہتے ہیں اور دلت اور شودر ذاتوں سے تعلق رکھنے والے لوگوں کی ایک بڑی تعداد رام ریاست کے قیام میں ان کی مدد کر رہی ہے۔ رام راجیا کا مطلب ورنا سسٹم اور اعلی ذاتوں کا راج ہوگا۔ یہ آئین جو مساوات کا دعوی کرتا ہے ، اس میں حقوق کی باتیں ختم کر دی جائیں گی کیونکہ رام راجیا عدم مساوات کی ریاست تھی۔ یہ ناانصافی کی ریاست تھی جس میں شودروں اور عورتوں کو عزت کے ساتھ جینے کا حق نہیں تھا۔
ان حالات میں اچھوتوں کا مستقبل خطرے میں ہے۔ اس کا نہ کوئی دوست ہے اور نہ کوئی حلیف۔ کچھ لوگ تواتر کے ساتھ اقتدار میں آنے کے لیے پارٹیاں بناتے ہیں لیکن منظم نہیں ہو پائے۔ سب سے زیادہ قابل رحم حالت ان لوگوں کی ہے جو امبیڈکر ہونے کا دعوی کرتے ہیں۔ایسے افراد پر لوگ اب ہنسنے لگے ہیں کیونکہ جب وہ اسٹیج پرتو برہمنوں پر تنقید کرتے ہیں،لیکن روز مرہ زندگی میں وہ اپنے بنائے ہوئے قوانین ، اونچ نیچ ، توہم پرستی ، رسم و رواج کی پیروی کرتے ہیں۔
ان حالات اور کمزوریوں کو دیکھتے ہوئے دلتوں کا مستقبل تاریک نظر آتا ہے۔ "ہندوتوا” کے نشہ آور اور خطرناک نعرے دلتوں کو بہت نقصان پہنچائیں گے۔ گاندھی اور کانگریس نے انہیں منظم ہونے سے روکا تھا اور ان کی ایک باقاعدہ شناخت میں رکاوٹیں کھڑی کی تھیں۔ انہیں دیگر اقلیتوں سے دور رکھنے کی کوشش کی۔ اس کی بنیادی وجہ یہ تھی کہ وہ ہندو مذہب کو مضبوط کرنا چاہتے تھے۔ اور کانگریس میں قیادت نام نہاد اعلی ذاتوں کے ہاتھ میں تھی۔
اب جو پارٹی ہندوتوا کا نعرہ بلند کر کے اقتدار میں آئی ہے وہ بھی وہی کر رہی ہے جو کانگریس کرتی تھی۔ اچھوتوں کو مسلمانوں سے لڑایا جائے تاکہ وہ متحد نہ ہوسکیں۔اچھوتوں میں ہندو رسم و رواج اور ذات پات کو فروغ دیا جائے تاکہ وہ منظم اور ان کے لیے خطرہ نہ بن سکیں۔ کانگرس اور بی جے پی ، دونوں پارٹیوں کے طریقوں میں فرق ہوسکتا ہے لیکن مقاصد میں نہیں۔
یہ دلتوں کے مفاد میں ہے کہ وہ بابا صاحب امبیڈکر کے دکھائے ہوئے راستے پر چلیں اور ذات پات ، قدامت پسندی ، رسم و رواج کی غلامی سے آزاد ہو کراپنی الگ شناخت بنائیں۔ اپنی زندگی سے ہندو مذہب کے اثرات اور نشانات کو ہٹا دیں۔ واضح الفاظ میں انہیں اپنے آپ کو ہندو مذہب کی غلامی سے آزاد کرانا چاہیے۔ اگروہ اپنا نام ، طرز زندگی ، کھانے پینے کی عادات الگ رکھیں اور اپنی شناخت بنائیں،اعلیٰ روحانی، معاشرتی اور سماجی اصولوں پر مبنی ایک نیا معاشرہ ، ایک نیا سماجی اور معاشی نظام بنائیں، تب ہی وہ آنے والے وقتوں میں عزت کے ساتھ زندگی گزار سکیں گے ۔
ہندو ازم کی غلامی ، پسماندگی ، غربت ، ناخواندگی ، جہالت ، ذہنی اور جسمانی کمزوری دلتوں کی غیر منظم ہونے کی بنیادی وجہ ہے۔ ترقی ، اور عزت کے ساتھ زندگی گزارنے کے لیے اس غلامی سے مکمل طور پر آزاد ہوناایسا ہی ضروری ہے جیسا کہ ایک غلام ملک کے لیے آزاد ہونا ۔