ترک ہلال احمر نے یمن میں، جہاں کئی سالوں سے خانہ جنگی جاری ہے، غریب خاندانوں اور ضرورت مند معذور افراد کو خوراک کے 500 پارسل فراہم کیے ہیں۔
ترک ہلال احمر یمن کے نمائندے ابراہیم عبید نے بتایا کہ یمن ہلال احمر کے تعاون سے صوبہ عدن کے شہر المنصورہ میں معذوروں کی دیکھ بھال اور بحالی ایسوسی ایشن کے صدر دفتر میں رمضان کی امداد ضرورت مندوں میں تقسیم کی گئی۔
منصورہ شہر میں غریب خاندانوں اور خصوصی ضروریات کے حامل افراد میں 500 کھانے کے پارسل تقسیم کیے جانے کا ذکر کرتے ہوئے، عبید نے کہا کہ یہ کام امدادی پروگراموں کا ایک حصہ ہے جس میں رمضان کے دوران یمن میں 5 ہزار کھانے کے پارسلوں کی تقسیم شامل ہے۔
عبید نے کہا کہ یہ امداد ترکی کی انسانی ہمدردی کی بنیاد پر امداد پہنچانے کی حساسیت کی عکاسی کرتی ہے تاکہ جنگ سے متاثرہ یمنیوں کے مصائب کو کم کیا جا سکے۔
ترک ہلال احمر یمن کے مختلف علاقوں میں ضرورت مندوں کو خوراک اور کپڑے، ہسپتالوں میں ادویات اور طبی سامان فراہم کرتا ہے۔
یمن میں ایرانی حمایت یافتہ حوثی باغیوں اور حکومتی فورسز کے درمیان برسوں سے جاری لڑائی میں تقریباً 377,000 افراد اپنی جانوں سے ہاتھ دھو بیٹھے ہیں ۔
یمن میں، جس کا شمار غریب ترین ممالک میں ہوتا ہے، خانہ جنگی کی وجہ سے بڑھنے والا انسانی بحران خوفناک حد تک پہنچ چکا ہے۔