پشاور: جرگے کے دوران فائرنگ کے واقعے میں پاکستان تحریک انصاف کے ناظم سمیت چار بھائی جاں بحق ہو گئے۔
میڈیا ذرائع کے مطابق غفور آباد ہزار خوانی میں تھانہ رحمان بابا کی حدود میں پلاٹ کے تنازع پر جرگہ جاری تھا۔ فریق اول اختر علی اور فریق دوم وحید کے مابین پلاٹ کے تنازع پر جرگہ کے دوران فائرنگ کا تبادلہ ہوا جس کے نتیجے میں 4 بھائی شکیل خان ، رفاقت خان، نثار خان اور وحید خان ساکنان ہزار خوانی جاں بحق اور 2 افراد زخمی ہوگئے۔
پولیس کے مطابق مقتولین میں پی ٹی آئی ہزار خوانی کے ناظم بھی شامل ہیں۔ واقعے کی اطلاع ملتے ہی ڈی ایس پی صدر محمد علی مقامی پولیس کے ہمراہ فوری موقع پر پہنچ گئے اور ضروری کارروائی کے بعد لاشوں کو پوسٹ مارٹم کے لیے اسپتال منتقل کردیا گیا۔
تفتیشی ٹیم نے جائے وقوع سے اہم شواہد اکٹھے کرلیے ہیں اور واقعے میں ملوث ملزمان کی گرفتاری کے لیے ان کے ممکنہ ٹھکانوں پر چھاپے مارے جارہے ہیں۔