ریاض : سعودی عرب کے مقدس شہر مکہ مکرمہ میں بڑھتے درجہ حرارت کی وجہ سے 577 عازمین حج جاں بحق ہو گئے ۔
المعسیم محلے میں واقع ہسپتال کے مردہ خانے سے حاصل ہونے والے کل اعداد و شمار کے مطابق اس سال حج کے دوران شدید گرمی کی وجہ سے کم از کم 550 عازمین جاں بحق ہوئے۔
تاہم، اے ایف پی کے مطابق، متعدد ممالک کی جانب سے اب تک رپورٹ ہونے والی اموات کی کل تعداد 577 تک پہنچ چکی ہے ۔
دو عرب سفارت کاروں نے انکشاف کیا کہ مرنے والے عازمین میں سے 323 مصری تھے جن میں سے زیادہ تر گرمی سے متعلق بیماریوں کا شکار ہو گئے۔
سفارت کاروں میں سے ایک نے کہا، “وہ تمام گرمی کی وجہ سے مر گئے” ۔
سفارت کاروں نے برقرار رکھا کہ کم از کم 60 اردنی باشندے بھی ہلاک ہوئے، جس سے عمان کی جانب سے منگل کو دی گئی سرکاری تعداد میں 41 کا اضافہ ہوا۔
گزشتہ ماہ شائع ہونے والی ایک سعودی تحقیق کے مطابق، حج کا سفر آب و ہوا کی تبدیلی سے تیزی سے متاثر ہو رہا ہے، جس میں کہا گیا ہے کہ جس علاقے میں عبادات کی جاتی ہیں وہاں درجہ حرارت ہر دہائی میں 0.4 ڈگری سینٹی گریڈ بڑھ جاتا ہے ۔
سعودی قومی موسمیات کے مرکز نے بتایا کہ پیر کے روز مکہ مکرمہ کی بڑی مسجد میں درجہ حرارت 51.8 ڈگری سینٹی گریڈ تک پہنچ گیاتھا ۔
گزشتہ سال مختلف ممالک کی جانب سے کم از کم 240 زائرین کی ہلاکت کی اطلاع دی گئی تھی، جن میں سے زیادہ تر انڈونیشیائی تھے۔
پیر کے روز مکہ مکرمہ کے باہر منیٰ میں حجاج کرام کو اپنے سروں پر پانی کی بوتلیں انڈیلتے ہوئے دیکھا گیا جب رضاکاروں نے ٹھنڈا رکھنے میں مدد کے لیے کولڈ ڈرنکس اور تیزی سے پگھلنے والی چاکلیٹ آئس کریم تقسیم کی۔
سعودی حکام نے عازمین کو دن کے گرم ترین اوقات میں چھتری استعمال کرنے، وافر مقدار میں پانی پینے اور سورج کی روشنی میں جانے سے گریز کرنے کا مشورہ دیا تھا۔
سعودی حکام کے مطابق، اس سال تقریباً 1.8 ملین عازمین حج نے شرکت کی، جن میں سے 1.6 ملین کا تعلق بیرون ملک سے تھا۔