ممبئی: بولی وڈ اسٹار اجے دیوگن اور ا داکارہ تبو کی فلم ’اوروں میں کہاں دم تھا‘ کی ریلیز ملتوی کردی گئی۔
’ سنگھم ‘ اسٹار اور ماضی کی مقبول اداکارہ کی نئی فلم کی ریلیز کا ان کے پرستاروں کو شدت سے انتظار ہے، مگر ان کا یہ انتظار ختم ہونے کے بجائے مزید طویل ہوگیا ہے کیوں کہ ان کی آنے والی فلم ’ اوروں میں کہاں دم تھا‘ کی ریلیز مزید تاخیر کا شکار ہوگئی ہے۔
قبل ازیں ’ اوروں میں کہاں دم تھا‘ کی نمائش کے لیے 5 جولائی کی تاریخ مقرر کی گئی تھی مگر فلم ساز کی جانب سے ایکس پر کی گئی پوسٹ کے مطابق ڈسٹری بیوٹرز کی خواہش پر فلم کی ریلیز ملتوی کردی گئی ہے اور نئی تاریخ کا اعلان بعد میں کیا جائے گا۔
’ اوروں میں کہاں دم تھا’ کی تشہیر زور و شور سے کی جارہی تھی، ایسے میں نمائش سے صرف تین دن پہلے ریلیز کی تاریخ ملتوی ہونے کے حوالے سے چہ مگوئیوں کا سلسلہ جاری ہے۔
سوشل میڈیا پر یہ تبصرے کیے جارہے ہیں کہ ’’ کالکی 2898 اے ڈی ‘‘ کی کامیابی کے پیش نظر فلم کی ریلیز کی تاریخ آگے بڑھائی گئی ہے۔