حکومت نے پاکستان تحریک انصاف کی قیادت کو بانی پی ٹی آئی سے ملاقات کی اجازت دینے کا عندیہ دے دیا ہے۔
پروگرام آج شاہزیب خانزادہ کے ساتھ میں گفتگو کرتے ہوئے وفاقی وزیر اطلاعات عطا اللہ تارڑ نے کہا کہ وزیراعلیٰ سہیل آفریدی کا رویہ اب بہتر ہے اور اگر پی ٹی آئی قیادت جیل مینوئل کی مکمل پابندی کرے تو ملاقات ممکن ہو سکتی ہے۔
عطا تارڑ کا کہنا تھا کہ ماضی میں جب نواز شریف جیل میں تھے تو ان کے وکلا نے کبھی سیاسی گفتگو نہیں کی بلکہ صرف قانونی معاملات پر توجہ دی۔ ان کے مطابق جب پی ٹی آئی قیادت ملاقات کے لیے جاتی ہے تو سیاسی بات چیت کی جاتی ہے جو جیل مینوئل کی خلاف ورزی ہے، اور ایسی صورت میں کسی کے ساتھ بھی رعایت نہیں برتی جائے گی۔
وفاقی وزیر اطلاعات نے کہا کہ بانی پی ٹی آئی عمران خان کو جیل میں تمام سہولیات میسر ہیں، ان کا ناشتہ ایک غریب کے چار دن کے کھانے کے برابر ہے، جیل میں ٹریڈ مل بھی دستیاب ہے اور وہ روزانہ ڈیڑھ گھنٹہ سائیکلنگ کرتے ہیں۔
عطا تارڑ نے مزید کہا کہ تحریک انصاف کی کال پر اب عوام سڑکوں پر نہیں نکلتے، خیبرپختونخوا میں حکومت ہونے کے باوجود پی ٹی آئی لوگوں کو متحرک نہیں کر پا رہی، جس سے ظاہر ہوتا ہے کہ پارٹی کا ووٹر مایوس ہو کر گھروں میں بیٹھ چکا ہے۔