محمد تسکین
بانہال/بھارتی ریلوے کی جانب سے کشمیر سے ملک کے دیگر حصوں تک رول آن رول آف (RORO)مال بردار سروس آئندہ دنوں میں شروع کیے جانے کا امکان ہے۔ ریلوے کے ایک افسر نے بتایا کہ مجوزہ سروس کے حوالے سے تیاریاں جاری ہیں۔مجوزہ RORO سروس کے تحت سامان سے لدے ٹرکوں کو براہِ راست خصوصی طور پر تیار کردہ فلیٹ ویگنوں پر رکھ کر ریل کے ذریعے منتقل کیا جائے گا۔ اس نظام کے تحت ٹرک اور ان میں موجود سامان دونوں ایک ساتھ ریل کے ذریعے اپنی منزل تک پہنچ سکیں گے، جس سے طویل فاصلے تک سڑک کے ذریعے سامان کی نقل و حمل کے متبادل کے طور پر ایک نیا راستہ میسر آئے گا۔
ریلوے کے سرکاری ذرائع کے مطابق مجوزہ سروس کے آغاز کے لیے انتظامات کو حتمی شکل دی جا رہی ہے، جبکہ سروس کے آغاز کی تاریخ، آپریشن کے طریقہ کار اور دیگر تفصیلات سے متعلق باضابطہ اعلان جلد متوقع ہے۔
یہ پیش رفت اودھم پور-سری نگر-بارہمولہ ریل لنک (USBRL)کی تکمیل کے بعد سامنے آئی ہے، جس نے کشمیر کو ملک کے دیگر حصوں کے ساتھ ہر موسم میں ریل رابطہ فراہم کیا ہے۔ ریلوے کی جانب سے جموں و کشمیر میں مال برداری کے دائرہ کار کو بھی وسعت دی جا رہی ہے، جبکہ حالیہ عرصے میں مختلف اشیائے ضروریہ پر مشتمل کھیپیں ریل کے ذریعے وادی کشمیر پہنچائی گئی ہیں۔
مجوزہ RORO سہولت سے ٹرانسپورٹروں اور کاروباری اداروں کو خاص طور پر طویل فاصلے تک سامان سے لدے ٹرکوں کی منتقلی کے لیے ایک نیا لاجسٹک آپشن دستیاب ہو سکتا ہے۔تاہم، RORO سروس کے آغاز سے متعلق ریلوے حکام کی باضابطہ تصدیق اور اعلان کا انتظار ہے۔
