شوہر کی ہلاکت، پولیس نے اہلیہ کو حراست میں لے لیا، تحقیقات کا آغاز کر دیا گیا ہے۔
مظفرگڑھ میں پیش آنے والے اس واقعے کے بعد پولیس کی تفتیش جاری ہے۔
مظفرگڑھ کی تحصیل علی پور کے علاقے میں ایک افسوسناک واقعے کے دوران بیوی نے مبینہ طور پر اپنے شوہر کو زہریلا مشروب پلا کر ہلاک کر دیا۔ پولیس نے فوری کارروائی کرتے ہوئے ملزمہ اہلیہ کو شک کی بنیاد پر حراست میں لے لیا ہے اور واقعے کی تفتیش شروع کر دی ہے۔
مقتول کے لواحقین کی جانب سے الزام عائد کیا گیا ہے کہ خاتون نے اپنے شوہر کو کوئی زہریلی شے پلائی جس کے نتیجے میں اس کی موت واقع ہوئی۔ لواحقین کا یہ بھی کہنا ہے کہ ملزمہ نے مبینہ طور پر اپنی ساس کو بھی تشدد کا نشانہ بنایا۔
پولیس حکام کا کہنا ہے کہ ملزمہ اس وقت پولیس کی تحویل میں ہے اور واقعے کے تمام پہلوؤں سے تحقیقات کی جا رہی ہیں۔ پولیس کے مطابق موت کے اصل اسباب اور حقائق پوسٹ مارٹم رپورٹ آنے کے بعد ہی سامنے آسکیں گے۔
