لاہور(نمائندہ جسارت)الخدمت فاؤنڈیشن کے تحت لاہور میں 2 ہزار یتیم بچوں،بیوہ خواتین اور اولڈ ایج ہومز میں رہنے والے بزرگ افراد کے لیے گرینڈ افطار اور عید تحائف کا اہتمام کیا گیا۔ اِس حوالے سے یوایم ٹی میں ایک پروقار تقریب منعقد کی گئی جس میں یتیم بچوں کے لیے جمپنگ کیسل، فیس پینٹنگ، میجک شو اوربچیوں کے لیے مہندی کے اسٹال کا خاص اہتمام کیا گیا تھاجبکہ یتیم بچوں اور معمر افراد میں عیدی، کپڑے اوردیگر تحائف بھی تقسیم کیے گئے۔ تقریب سے خطاب کرتے ہوئے نائب صدر الخدمت فاؤنڈیشن پاکستان ڈاکٹر محمدمشتاق مانگٹ نے کہا کہ یتیم بچے اوریہ بے گھر بزرگ افراد ہمارے معاشرے کا سب سے توجہ طلب طبقہ ہے۔اسی مقصد کے تحت الخدمت فاؤنڈیشن ہر سال لاہور سمیت ملک بھر میں ایسی تقریبات کا اہتمام کرتی ہے۔ مختلف یوتھ سوسائٹیز کاالخدمت کے ساتھ ملکر اس رنگا رنگ تقریب کا انعقاد اس بات کا ثبوت ہے ہمارے نوجوان خدمت خلق کے کاموں میں دلچسپی لے رہے ہیں۔اس موقع پر یو ایم ٹی کی ڈائریکٹر انسٹی ٹیوشنل ڈیولپمنٹ ڈاکٹرنوشابہ حسن مرادکا کہنا تھا کہ یتیم بچوں کی کفالت ہم سب کا اخلاقی اور مذہبی فریضہ ہے۔ رمضان اور عید کی خوشیوں میں اپنے ساتھ شریک کرنا یتیم بچوں اور بے سہارا معمر افراد کا بھی حق ہے۔ تقریب میں صدر الخدمت وسطی پنجاب اکرام الحق سبحانی، صدرالخدمت لاہور انجینئر احمد حماد اور یوتھ سوسائٹیز کے ارکان اور زندگی کے مختلف شعبہ جات سے تعلق رکھنے والے خواتین و حضرات نے شرکت کی۔