پشاور:خیبر پختونخوا اسمبلی نے 28 مئی یوم تکبیر کے موقع پر وفاقی حکومت کی جانب سے سرکاری چھٹی کا فیصلہ مسترد کرتے ہوئے بجٹ اجلاس جاری رکھنے کی منظوری دے دی۔
میڈیا رپورٹس کے مطابق وفاقی حکومت کا ملک بھر میں 28 مئی کو عام تعطیل کے اعلان پر خیبر پختونخوا اسمبلی میں جاری بجٹ اجلاس میں صوبائی وزیر خزانہ آفتاب عالم نے ایک قرارداد پیش کی، جس میں ایوان سے مطالبہ کیا گیا کہ وفاقی حکومت کی جانب سے 28 مئی کو عام تعطیل مسترد کی جائے۔
قرار داد کو ایوان نے متفقہ طور پر منظور کرلیا، قرارداد کے متن میں کہا گیا تھا کہ خیبر پختونخوا بجٹ اجلاس 28 مئی کی سرکاری چھٹی سمیت ہفتے اتوار کو بھی جاری رہے گا۔
خیال رہے کہ وزیرِاعظم شہباز شریف نے پاکستان کے دفاع کو ناقابل تسخیر بنانے کے دن، 28 مئی یوم تکبیر کو سرکاری چھٹی قرار دیتے ہوئے 28 مئی کو ملک بھر میں عام تعطیل کا اعلان کیا ہے۔
