خیرپور: ریلوے لائن پر کریکر دھماکے کے بعد روٹ پر آنے والی ٹرینوں کو مختلف مقامات پر روک دیا گیا۔
نجی ٹی وی کی رپورٹ کے مطابق خیرپور کے علاقے فیض آباد ریلوے پھاٹک کے قریب ٹرین کی پٹڑی پر کریکر بم کا دھماکا ہوا، جس سے ریلوے لائن کو معمولی نقصان پہنچا۔
پولیس کے مطابق دھماکے کے بعد ایک مشتبہ ملزم کو گرفتار کرکے اس کے قبضے سے دھماکا خیز مواد برآمد کیا گیا ہے جب کہ ایک اور ملزم کی تلاش کے لیے چھاپا مار کارروائیاں جاری ہیں۔
کریکر دھماکے کے بعد حفاظتی انتظامات اور تلاشی کی وجہ سے ٹرینوں کو مختلف مقامات پر روک دیا گیاتھا اور ٹریک کو بحال کرنے کا کام شروع کیا گیا۔
پولیس کے مطابق ملزمان نے کراچی سے پنجاب جانے والی پاکستان ایکسپریس کو نشانہ بنانے کی کوشش کی۔
