اسلام آباد:لاپتا شہری کی بازیابی سے متعلق کیس میں ہائی کورٹ نے پولیس رپورٹ مسترد کرتے ہوئے آئی جی اسلام آباد کو عدالت طلب کرلی۔
نجی ٹی وی کی رپورٹ کے مطابق اسلام آباد ہائی کورٹ کے جسٹس بابر ستار نے لاپتا شہری فیضان عثمان کے والد کی درخواست پر سماعت کی، جس میں ایمان مزاری اور ہادی چٹھہ بطور وکیل اور اسٹیٹ کونسل کے علاوہ پولیس حکام عدالت کے روبرو پیش ہوئے۔
وکلا نے عدالت کو بتایا کہ پیر کے روز فیضان کو چھوڑ دیا گیا ہے، جس پر عدالت نے استفسار کیا کہ اس سلسلے میں کوئی تفتیش کی گئی یا نہیں؟ جس پر پولیس حکام نے عدالت کو بتایا کہ تاحال تفتیش نہیں کی گئی، ایک ویڈیو اپ لوڈ ہوئی تھی، جس پر عدالت نے اظہار برہمی کرتے ہوئے کہا کہ لاپتا شہری کو چھوڑے ہوئے چار دن ہوگئے اور ابھی تک تفتیش نہیں کی جا سکی؟۔
بعد ازاں عدالت نے آئی جی اسلام آباد کو طلب کرتے ہوئے سماعت میں وقفہ کیا اور آئی جی اسلام آباد کے آنے پر سماعت دوبارہ شروع کی، جس میں عدالت نے آئی جی رپورٹ کو غیر تسلی بخش قرار دیتے ہوئے آئندہ ہفتے تک تفصیلی رپورٹ طلب کر لی اور سماعت ملتوی کردی۔