پشاور: خیبر پختونخوا حکومت کے مشیر بیرسٹر سیف نے کہا ہے کہ الیکشن کمیشن آئیں بائیں شائیں چھوڑے اور مخصوص نشستوں کا نوٹیفکیشن فوری جاری کرے۔
مخصوص نشستوں کے حوالے سے جاری ایک بیان میں خیبر پختونخوا حکومت کے مشیر بیرسٹر سیف کا کہنا ہے کہ مخصوص نشستوں کے معاملے پرعدالت عظمی کی دو بار وضاحت کے باوجود مزید تاخیر برداشت نہیں کریں گے۔الیکشن کمیشن آئیں، بائیں اور شائیں نہ کرے بلکہ مخصوص نشستوں کا نوٹیفکیشن فوری جاری کیا جائے۔
بیرسٹر سیف نے کہا کہ شاہ سے زیادہ شاہ کی وفاداری میں الیکشن کمشنر آرٹیکل 6 کے مرتکب ہوئے ہیں۔ ان کے خلاف آرٹیکل 6 اور توہین عدالت کی کارروائی ہونی چاہیے۔
ان کا مزید کہنا ہے کہ ایک الیکشن کمشنر 8 ججز کے حکم کو تاخیری حربوں سے نظر انداز کرنے کی کوشش کر رہا ہے اور وہ حکومت کے احکامات پر آئین اور قانون کو روند رہا ہے جب کہ شریف خاندان اعلی عدلیہ پر بار بار حملہ آور ہو رہا ہے۔