امریکا میں مجرمانہ سرگرمیوں کے خلاف کارروائیوں کے دوران مزید بھارتی شہریوں کی گرفتاری سامنے آئی ہے جس کے بعد امریکی حکام نے ان کے خلاف ملک بدری کے احکامات جاری کر دیے ہیں۔
میڈیا رپورٹس کے مطابق امریکی شہر سان ڈیاگو میں قانون نافذ کرنے والے اداروں نے ایک بھارتی شہری کو سنگین جرائم میں ملوث ہونے کے الزام میں گرفتار کیا ہے۔
میڈیا رپورٹ کے مطابق گرفتار ہونے والے بھارتی شہری کی شناخت جسکرن سنگھ کے نام سے ہوئی ہے۔ امریکی حکام کے مطابق انفورسمنٹ اینڈ ریموول آپریشنز نے کارروائی کرتے ہوئے اسے حراست میں لیا۔ حکام کا کہنا ہے کہ مذکورہ شخص مختلف مجرمانہ سرگرمیوں میں ملوث تھا جس کے باعث اس کے خلاف قانونی کارروائی کی گئی۔
امریکی حکام کے مطابق جسکرن سنگھ کو ’’کرمنل ایلین‘‘ قرار دیا گیا ہے اور اس کے خلاف حتمی طور پر ملک بدری کا حکم جاری کر دیا گیا ہے۔
حکام کے مطابق ایسے افراد کے خلاف کارروائی امریکی قوانین کے مطابق کی جاتی ہے اور انہیں ملک میں رہنے کی اجازت نہیں دی جاتی۔
رپورٹس میں بتایا گیا ہے کہ ایک روز قبل بھی سان ڈیاگو میں ایک اور بھارتی شہری جشن پریت سنگھ کو گرفتار کیا گیا تھا۔ امریکی حکام کے مطابق دونوں افراد کے خلاف سنگین نوعیت کے جرائم کی تحقیقات جاری تھیں جس کے بعد انہیں حراست میں لیا گیا۔
امریکی حکام کا کہنا ہے کہ بعض بھارتی شہری مختلف مجرمانہ سرگرمیوں اور منظم جرائم میں ملوث پائے گئے ہیں۔ اسی وجہ سے ایسے افراد کے خلاف سخت اقدامات کیے جا رہے ہیں تاکہ ملک میں قانون کی عمل داری برقرار رکھی جا سکے۔
عالمی امور کے بعض ماہرین کا کہنا ہے کہ مختلف ممالک میں منظم جرائم پیشہ نیٹ ورکس سرگرم ہو رہے ہیں جو سیکیورٹی کے لیے خطرہ بن سکتے ہیں۔ ماہرین کے مطابق اگر ان نیٹ ورکس کے خلاف مربوط اور مؤثر عالمی اقدامات نہ کیے گئے تو مستقبل میں دیگر ممالک کو بھی سیکیورٹی کے چیلنجز کا سامنا کرنا پڑ سکتا ہے۔
تجزیہ کاروں کے مطابق ایسے واقعات کی مکمل تحقیقات اور بین الاقوامی سطح پر تعاون انتہائی ضروری ہے تاکہ منظم جرائم کے نیٹ ورکس کو مؤثر طریقے سے روکا جا سکے اور عالمی سطح پر سیکیورٹی کو درپیش خطرات کم کیے جا سکیں۔