وفاقی وزیر داخلہ محسن نقوی نے کہا ہے کہ گزشتہ چند برسوں کے دوران تقریباً 100 ارب ڈالر ملک سے باہر منتقل ہوئے ہیں، تاہم اگر کاروباری طبقہ سنجیدہ اقدام کرے تو اس کا ایک قابلِ ذکر حصہ واپس لایا جا سکتا ہے، جس سے ملکی معیشت کو فوری سہارا مل سکتا ہے۔
کراچی میں فیڈریشن ہاؤس میں تاجروں سے خطاب کرتے ہوئے انہوں نے کہا کہ روشن اکاؤنٹس کے ذریعے بیرونِ ملک موجود رقوم کی واپسی کا ایک مؤثر راستہ موجود ہے اور اگر تاجر اپنی بیرونِ ملک موجود رقم کا صرف 30 فیصد بھی واپس لے آئیں تو معیشت میں واضح بہتری آ سکتی ہے۔ یہ اقدام بجٹ سے قبل ہی تقریباً 10 ارب ڈالر تک کے مالی وسائل ملک میں واپس لا سکتا ہے۔
محسن نقوی نے کہا کہ پاکستان میں سرمایہ کاری کے مواقع اور منافع کی شرح دنیا کے کئی ممالک سے بہتر ہے، اور اگر کاروباری طبقہ موجودہ حالات سے فائدہ اٹھائے تو ایک مضبوط اور سازگار کاروباری ماحول تشکیل دیا جا سکتا ہے۔
انہوں نے بتایا کہ تاجروں کے ویزوں سے متعلق نئی تجاویز جلد وزیراعظم کو پیش کی جائیں گی تاکہ کاروباری سرگرمیوں کو مزید سہولت دی جا سکے۔
وفاقی وزیر داخلہ نے اس موقع پر یہ بھی کہا کہ وفاقی تحقیقاتی ادارے کے طریقہ کار کو مزید کاروبار دوست بنایا جا رہا ہے تاکہ غیر ضروری رکاوٹوں کا خاتمہ ہو سکے۔ کسی ایک یا دو فیصد عناصر کی وجہ سے پوری کاروباری برادری کو مشکلات کا سامنا نہیں ہونا چاہیے۔
انہوں نے مزید کہا کہ حکومت یہ نہیں چاہتی کہ بیرونِ ملک موجود تمام رقوم فوری طور پر واپس لائی جائیں، تاہم اگر روشن اکاؤنٹس کے تحت صرف 20 سے 30 فیصد سرمایہ بھی واپس آ جائے تو اس کا حجم 10 ارب ڈالر سے زائد ہو سکتا ہے، جو ملکی معیشت کے لیے ایک اہم پیش رفت ہوگی۔
