سری نگر/جموں و کشمیر کیجول/ڈیلی ویجرز فورم (JKCDF) نے جمعہ کو شیرِ کشمیر پارک سری نگر میں پُرامن احتجاج کرتے ہوئے حکومت سے کیجول اور ڈیلی ویجر ملازمین کے دیرینہ مسائل حل کرنے کا مطالبہ کیا۔فورم کے صدر سجاد احمد پرے کی قیادت میں ہونے والے احتجاج کے دوران انہوں نے کہا کہ ملازمین طویل عرصے سے اپنے جائز مطالبات کے حل کے منتظر ہیں اور حکومت کو اس معاملے پر فوری توجہ دینی چاہیے۔
سجاد احمد پرے نے کہا کہ حکومت ملازمین کو پانی کی سپلائی بند کرنے جیسے سخت قدم اٹھانے پر مجبور نہ کرے۔انہوں نے کہا، ’’ہم ملازمین ہیں اور عوام کی خدمت کرنا ہمارا فرض ہے۔ حکومت سے اپیل ہے کہ وہ ہمیں پانی کی سپلائی بند کرنے کی کال دینے پر مجبور نہ کرے۔ اگر ایسا ہوا تو ایک قطرہ پانی بھی نہیں بہے گا۔‘‘
انہوں نے کہا کہ فورم اپنے مطالبات کے حق میں پُرامن اور جمہوری جدوجہد جاری رکھے گا اور حکومت پر زور دیا کہ وہ ملازمین کے مسائل کا سنجیدگی سے نوٹس لیتے ہوئے ان کے حل کے لیے فوری اقدامات کرے۔
