نئی دہلی/وزیر اعظم نریندر مودی نے فلم اداکار نانا پاٹیکر کے انتقال پر گہرے رنج و غم کا اظہار کرتے ہوئے ان کی شخصیت اور ہندوستانی سنیما میں ان کی نمایاں خدمات کو یاد کیا ہے۔ مودی نے نانا پاٹیکر کو ایک منفرد اور مختلف طرح کے کرداروں کو جاندار بنانے والے ہمہ جہت اداکار قرار دیتے ہوئے ان کی صلاحیتوں کو یاد کیا ہے۔
وزیر اعظم نے سوشل میڈیا پر ایک پیغام میں کہا، ’’نانا پاٹیکر جیسی شدت، انفرادیت اور پُراثر موجودگی بہت کم اداکاروں میں دیکھنے کو ملتی ہے۔ انہوں نے ہر کردار میں حیرت انگیز تنوع اور تخلیقی صلاحیت کا مظاہرہ کیا اور ہمیں ایسے کردار دیے جنہیں نسلوں تک یاد رکھا جائے گا۔‘‘
مودی نے کہا کہ پاٹیکر کو اپنے بے باک اور صاف خیالات کے لیے بھی سراہا جاتا تھا، وہ اپنی بات کہنے میں کبھی ہچکچاتے نہیں تھے۔وزیر اعظم نے کہا، ہندی اور مراٹھی سنیما میں نانا پاٹیکر کی خدمات بہت بڑی ہیں۔ ان کے انتقال سے ایک بڑی کمی محسوس ہو رہی ہے۔ ان کے اہل خانہ، دوستوں اور بے شمار مداحوں کے تئیں میری تعزیت ہے۔ اوم شانتی۔
دریں اثنا لوک سبھا میں حزب اختلاف کے رہنما راہل گاندھی اور کانگریس کی جنرل سکریٹری پرینکا گاندھی واڈرا نے مشہور اداکار نانا پاٹیکر کے انتقال پر گہرے رنج و غم کا اظہار کیا ہے۔راہل گاندھی نے جمعرات کو سوشل میڈیا پر ایک پوسٹ میں کہا کہ مشہور اداکار نانا پاٹیکر کے انتقال کی خبر انتہائی افسوسناک ہے۔ اپنی اداکاری اور کرداروں کے ذریعے انہوں نے ہندوستانی سنیما اور ناظرین کے دلوں پر انمٹ نقوش چھوڑے ہیں۔راہل گاندھی نے اس دکھ کی گھڑی میں ان کے سوگوار اہل خانہ، دوستوں اور حامیوں کے تئیں گہری تعزیت کا اظہار کیا۔
ادھر کانگریس کی جنرل سکریٹری پرینکا گاندھی واڈرا نے بھی نانا پاٹیکر کے انتقال پر تعزیت کا اظہار کرتے ہوئے کہا کہ ہندوستانی سنیما کے مقبول اداکار کے اچانک انتقال کی خبر انتہائی افسوسناک ہے۔انہوں نے کہا کہ نانا پاٹیکر کی زبردست اداکاری اور سماجی مسائل کے تئیں ان کی وابستگی عوام کی یادوں میں ہمیشہ زندہ رہے گی۔ انہوں نے عظیم اداکار کو خراج عقیدت پیش کیا۔
