اسلام آباد(اے پی پی) انٹرنیشنل اسلامی یونیورسٹی کے ریکٹر ڈاکٹر معصوم یاسین زئی نے جامعہ میں تصادم کے واقعے میں شہید ہونے والے طفیل الرحمن کے ورثا کے لیے ملازمت جبکہ زخمی طلبہ کو وظائف دینے کا اعلان کیا ہے۔ تفصیلات کے مطابق اسلامک انٹرنیشنل یونیورسٹی کے ریکٹر ڈاکٹر معصوم یاسین زئی نے پیر کو پمز اسپتال میں زیر علاج زخمی طالبعلموں کی عیادت کی۔ اس موقع پر انہوں نے اعلان کیا
کہ طفیل الرحمن کے ورثا کو ملازمت دی جائے گی جبکہ واقعے میں زخمی ہونے والے طلبہ کواسکالر شپ دی جائے گی۔ انہوں نے کہا کہ یونیورسٹی میں افسوسناک واقعہ سازش کے تحت ہوا ہے، جسے بے نقاب کرنے کی ہر ممکن کوشش کی جا رہی ہے۔ انہوں نے کہا کہ واقعے میں ملوث افراد کو کیفرکردار تک پہنچایا جائے گا۔
