ڈیفنس فیز 6 خیابان سحر میں ڈیزل کی بو پورے علاقے میں پھیلنے سے مکینوں کو دشواریوں کا سامنا
کراچی (اسٹاف رپورٹر) ڈیفنس خیابان سحر سے گزرنے والی زیر زمین ڈیزل کی پائپ لائن پھٹنے سے ہزاروں لیٹر ڈیزل ضائع ہوگیا۔ تفصیلات کے مطابق درخشاں تھانے کے علاقے ڈیفنس فیز 6 خیابان سحر سے گزرنے والی ڈیزل کی زیر زمین گزرنے والی پائپ لائن پھٹ گئی جس کے باعث ہزاروں لیٹر ڈیزل سڑک پر بہہ گیا جس کے باعث سڑک کو بند کر دیا گیا، پائپ لائن سے نکلنے اور سڑک پر بہہ جانے والے ڈیزل کی بُو پورے علاقے میں پھیل گئی اور علاقہ مکینوں کو دشواری کا سامنا ہے۔ ایس ایچ او درخشاں اعظم گوپانگ نے بتایا کہ خیابان سحر سے زیر زمین گزرنے والی ڈیزل پائپ لائن سے رسائو کے واقعہ سے فوری طور پر متعلقہ حکام کو آگاہ کر دیا گیا تھا جس پر متعلقہ حکام کی ٹیم موقع پر پہنچ گئی تھی اور لائن کی مرمت کا کام شروع کر دیا گیا ہے۔
