روس کے اپوزیشن لیڈر اور صدر پیوٹن کے شدید مخالف الیگزے ناوالنے کو زہر دے دیا گیا۔
اپوزیشن لیڈر کی ترجمان نے بتایا ہے کہ الیگزے ناوالنے ماسکو سے واپس آرہے تھے کہ ممکنہ طور پر انہیں دروان پرواز زہر دے دیا گیا جس سے ان کی حالت بگڑ گئی۔
ترجمان نے اپنے ٹوئٹر بیان میں لکھا کہ دوران پرواز چائے میں مبینہ طور پر زہر ملا کر دیا گیا جسے پینے کے بعد الیگزے ناوالنے کی حالت غیر ہوگئی اور انہیں فوری طور پر سائبریا کے اسپتال منتقل کیا گیا۔
انہوں نے بتایا کہ الیگزے ناوالنے کی حالت تشویشناک ہے اور وہ کوما میں چلے گئے ہیں، انہیں انتہائی نگہداشت کے وارڈ ماہر ڈاکٹرز کی زیر نگرانی رکھا گیا ہے۔
ترجمان کا کہنا ہے کہ الیگزے ناوالنے کو وینٹی لیٹر سپورٹ دی جارہی ہے اور مصنوعی تنفس کے ذریعے سانس بحال رکھنے کی کوشش کی جارہی ہے۔
