پاکستان نے فوجی چیک پوسٹ پر سرحد پار حملے کے بعد افغان حکومت سے دہشت گردوں کے خلاف فوری کارروائی کا مطالبہ کردیا۔
ترجمان دفتر خارجہ زاہد حفیظ نے اپنے بیان میں کہا کہ پاکستان افغان سرزمین سے ہونے والے دہشت گرد حملے کی شدید مذمت کرتا ہے۔ افغانستان سے دہشت گردوں نے ضلع مہمند میں پاک فوج کی چیک پوسٹ پر فائرنگ کی۔
پاکستان نے کہا کہ افغان حکومت افغانستان میں پناہ لینے والی دہشت گرد تنظیموں کے خلاف کارروائی کرے۔
گزشتہ روز افغانستان کے ساتھ بین الاقوامی سرحد کے پار سے ضلع مہمند میں پاک فوج کی چیک پوسٹ دہشت گردوں کی فائرنگ کے نتیجے میں ایف سی کا ایک جوان شہید ہوگیا تھا۔ جب کہ پاک فوج کے جوانوں نے دہشت گردوں کو فوری او ر منہ توڑ جواب دیا۔
آئی ایس پی آر کے مطابق بدھ کو بین الاقوامی سرحد کے ساتھ افغانستان کی طرف سے دہشت گردوں نے ضلع مہمند میں فوجی چیک پوسٹ پر فائرنگ کردی۔ فائرنگ کے تبادلے میں ایف سی کا ایک اہلکار سپاہی فضل واحد جام شہادت نوش کرگیا۔ 25 سالہ فضل واحد کا تعلق شانگلہ سوات سے ہے۔
