اسرائیلی وزیر اعظم نیتن یاھو نے اپنے ٹویٹر اکاؤنٹ کے بینر سے سبکدوش ہونے والے امریکی صدر ڈونلڈ ٹرمپ کے ساتھ کھنچوائی گئی اپنی تصویر ہٹا دی۔
رائٹرز نیوز ایجنسی نے تجزیہ کاروں کا حوالہ دیتے ہوئے کہا ہے کہ سیاسی اتحادی کے ساتھ لاتعلقی کا یہ اقدام ایک ایسے وقت میں سامنے آیا ہے جب ٹرمپ کو ممکنہ مواخذے کا سامنا ہے۔
وائٹ ہاؤس میں ٹرمپ کے ساتھ بیٹھے نیتن یاھو کی تصویر نیتن یاہو کے سرکاری ٹویٹر اکاؤنٹ کے بینر پر طویل عرصے سے تھی جس میں ان دونوں افراد کے مابین قریبی تعلقات کی عکاسی ہوتی تھی۔ یہاں تک کہ امریکی الیکشن میں امریکی صدر منتخب ہونے والے جو بائیڈن سے ٹرمپ کے ہار جانے کے بعد بھی اسے ہٹایا نہیں گیا تھا۔
ٹرمپ کے ساتھ تصویر کی جگہ نیتن یاہو نے نئے سال کی تقریبات سے متعلق ایک تصویر لگائے جسے بعد ازاں کورونا وائرس ویکسین وصول کرتے ہوئے تصویر سے تبدیل کردیا گیا۔
