ملتان(جسارت نیوز)شہر اولیاء ملتان میں انٹرنیشنل اسپورٹس ایونٹ کی میزبانی کی تیاریاں شروع ،ملتان میں رواں مہینے بلوچستان انٹرنیشنل اسکواش لیگ اور جنوبی پنجاب اسکواش لیگ کا میلہ سجے گا ،ان اسکواش لیگ میں ملکی اور بین الاقوامی سطح کے کھلاڑی شرکت کریں گے۔اس بڑے اسپورٹس ایونٹ کے سلسلے میں بدھ کو ڈپٹی کمشنر عامر خٹک کی زیرصدارت انٹرنیشنل اسکواش لیگ کی تیاریوں بارے جائزہ اجلاس منعقد ہوا۔ا سکواش کے انٹرنیشنل ایونٹ میں 24غیر ملکی اور32قومی کھلاڑی حصہ لیں گے،غیر ملکی کھلاڑیوں کی آمد کا سلسلہ 12 فروری کو شروع ہو جائے گاجب کہ انٹرنیشنل اسکواش لیگ کے میچز کا آغاز15 فروری سے ہوگا، اسکواش لیگ کا فائنل19 فروری کو کھیلا جائے گا۔
