لاہور: تین ٹی ٹوئنٹی میچوں کی سیریز کے آخری اور فیصلہ کن معرکے میں پاکستان نے ٹاس جیت کر پہلے فیلڈنگ کا فیصلہ کیا ہے۔
لاہور کے قذافی اسٹیڈیم میں کھیلے جارہے تیسرے ٹی ٹوئنٹی میچ میں قومی ٹیم کے کپتان بابر اعظم نے ٹاس جیت کر مہمان جنوبی افریقن ٹیم کو پہلے بیٹنگ کی دعوت دی ہے۔
اس موقع پر کپتان بابر اعظم نے بتایا کہ ٹیم میں تین تبدیلیاں کی گئی ہیں اور افتخاراحمد ، خوشدل شاہ اورحارث رؤف کو ڈراپ کیا گیا ہے جبکہ ان کی جگہ آصف علی، حسن علی اور زاہد محمود کو ٹیم میں شامل کیا گیا ہے۔انہوں نے بتایا کہ زاہد محمود ٹی ٹوئنٹی ڈیبیو کریں گے۔
دوسری جانب جنوبی افریقی ٹیم میں ایک تبدیلی کی گئی ہے اور بورجن فورٹیون کی ٹیم میں واپسی ہوئی ہے۔
خیال رہے کہ پہلے ٹی ٹوئنٹی میں پاکستان نے جنوبی افریقہ کو 3 رنز سے شکست دی تھی، گزشتہ روز دوسرے ٹی ٹوئنٹی ميں جنوبی افریقا نے پاکستان کو 6 وکٹ سے ہرا کر سیریز ایک ایک سے برابر کر دی تھی۔
