لاہور: مسلم لیگ ن کے رہنما سعد رفیق کا کہنا ہے کہ روزمرہ استعمال کی تمام اشیا مہنگی نہیں بہت مہنگی کر دی گئی ہیں، پی ٹی آئی نے پھلتا پھولتا پاکستان تباہ کر دیا۔
احتجاجی مظاہرے سے خطاب کرتے ہوئے سعد رفیق نے کہا کہ پاکستان کو ان نالائق حکمرانوں کے ہاتھ یرغمال نہیں رہنے دیں گے، نااہل حکومت کی وجہ سے ابھی مہنگائی کی ایک اور لہر آئے گی۔
رہنما ن لیگ کا کہنا تھا کہ حکومت جو معاہدے کرتی ہے وہ کبھی پورے نہیں کرتی، پاکستان کو اجاڑ کر رکھ دیا ہے، ملک کو تباہی کے راستے پر ڈال دیا گیا اور چینی، آٹا و گھی سب مہنگا کردیا گیا۔
انہوں نے کہا کہ کرپشن کا چورن بیچا گیا اور نیب کو تماشہ بنایا مگر پوچھنے والا کوئی نہیں ہے، مہنگائی کا عذاب مسلط کرنے اور اس کی سرپرستی کرنے والے سے قوم کو نجات چاہیے۔
