اسلام آباد:پاکستان تحریک انصاف کے سینئر نائب صدر فواد چوہدری نے کہا ہے کہ سپریم کورٹ کو شہباز شریف کو بھی فارغ کر کے مریم نواز کی خواہش پوری کر دینی چاہئے۔
سماجی رابطے کی ویب سائٹ ٹوئٹرپربیان میں فواد چوہدری نے کہا کہ امید ہے سٹیٹ بینک سپریم کورٹ کے حکم پر عمل کرے گا اور آئین کے تحت انتخابات کیلئے رقم الیکشن کمیشن کو جاری کر دی جائیگی، اگر ایسا نہیں ہوتا تو سٹیٹ بینک گورنر تو توہین عدالت میں فارغ ہوں گے لیکن سپریم کورٹ کو شہباز شریف کو بھی فارغ کر کے مریم نواز کی خواہش پوری کر دینی چاہئے۔
انہوں نے کہا کہ سپریم کورٹ کا فیصلہ صرف الیکشن کو 14 مئی تک لے جانے تک محدود ہے، نگران حکومت کو نہیں۔آئین میں 90 دن کے بعد نگران حکومت کی کوئی جگہ نہیں کیونکہ آئین ساز یہ سوچ ہی نہیں سکتے تھے کہ انتخابات 90 روز سے آگے جا سکتے ہیں۔اس لئے 22 اپریل کے بعد پنجاب کی نگران حکومت ختم ہو جائے گی۔
