میامی: بلوچستان کے صوبائی دارالحکومت کوئٹہ سے تعلق رکھنے والے مارشل آرٹس کھلاڑی شاہ زیب رند نے امریکا میں کراٹے کامبیٹ میں اپنا دوسرا مقابلہ جیت لیا۔ شکست حریف کھلاڑی نے مشتعل ہوکر تماشائیوں پر کرسیاں پھینک دیں۔
میڈیا ذرائع کے مطابق امریکا کی ریاست فلوریڈا کے شہر میامی میں لائٹ ویٹ کیٹگری میں پاکستانی کھلاڑی کا مقابلہ فرانس کے 23 سالہ ٹومی ایزوزا سے تھا۔تین راؤنڈز پر مشتمل مقابلے کے پہلے راؤنڈ کے آغاز میں ہی ٹومی ایزوزا نے شاہ زیب رند پر زبردست حملہ کیا اور انہیں گرانے کی کوشش کی لیکن زیادہ دیر تک ایزوزا کے داؤ پیچ چل نہ سکے۔
باقی دو راؤنڈز میں شاہ زیب رند حاوی رہے اور حریف کھلاڑی پر جارحانہ انداز میں تابڑ توڑ حملے کیے۔اس طرح تین تین منٹ کے تین راؤنڈز مشتمل مقابلے کے اختتام پر پاکستانی کھلاڑی فاتح قرار پائے۔
this gotta be one of the greatest crowd brawl videos of all time. pic.twitter.com/hnIXuQoxXg
— MacMally 🍀 (@MacMallyMMA) May 22, 2023
جیت کے بعد پاکستانی تماشائیوں نے شاہ زیب کے حق میں بھر پور نعرے لگائے جبکہ کھلاڑی نے قومی پرچم بلند کیا اور اس کے بعد سجدہ ریز ہوکر شکر ادا کیا۔مقابلہ ہارنے پر فرانسیسی کھلاڑی اور ان کے کوچ آپے سے باہر ہوگئے اور انہوں نے شاہ زیب کے حق میں نعرے لگانے والے پاکستانی تماشائیوں پر کرسی پھینکی۔ اس دوران سکیورٹی گارڈز کو مداخلت کرنا پڑی۔
