فیصل آباد: نائب امیر جماعت اسلامی راشد نسیم نے کہا ہے کہ مغرب زدہ شخصیات کی حکومتیں ملک کے مسائل کا حل نہیں۔
راشدنسیم کاکہنا تھا کہ ترقی، امن اور خوشحالی کے لیے اسلامی اذہان، اہل اور ایمان دار لوگوں کو مسند اقتدار پرہونا چاہیے، قوم اس مقصد کے حصول کے لیے جماعت اسلامی کا ساتھ دے۔
المرکز الاسلام فیصل آباد میں یوم تاسیس کی تقریب سے خطاب کرتے ہوئے انھوں نے کہا کہ بانی جماعت سید ابوالاعلیٰ مودودی نے اسلامی ریاست کا نظریہ اس وقت پیش کیا جب دنیا میں سرمایہ دارانہ اور کیمونسٹ ادوار کا راج تھا، اس وقت ان کی آواز تنہا تھی، لیکن آج پاکستان کا ہر شہری اسی نظام کا خواہاں ہے حتیٰ کہ سیکولر جماعتیں بھی مدینہ کی اسلامی ریاست کا نعرہ لگانے پر مجبور ہیں، اگرچہ ان کے نعروں میں اخلاص نہیں اور وہ محض عوام کی ہمدردی چاہتے ہیں۔
