ملتان(نمائندہ خصوصی)پاکستان اورانگلینڈ کی کرکٹ ٹیموں کے درمیان ملتان میں کھیلے جانے والے 2ٹیسٹ میچوں کے لیے پچ کاانتخاب کرلیاگیا ۔ملتان کرکٹ اسٹیڈیم میں موجود 11 پچز میں سے درمیان کی پچ کاانتخاب کیاگیا۔جہاں یہ میچز کھیلے جائیں گے ۔ گزشتہ روز کھلاڑیوں کی ٹریننگ اورپریکٹس کے دوران پچز تیار کی جاتی رہیں اوران پر بھاری بھرکم رولرپھیرے جاتے رہے ۔دور سے یہ پچز سبز دکھائی دے رہی ہیں تاہم اب تک کسی کھلاڑی یاٹیم کی انتظامیہ کو پچز کے قریب نہیں جانے دیاگیا ۔ان کی رونمائی میچ سے ایک روز قبل متوقع ہے ۔کرکٹ بورڈ کے ذرائع کے مطابق پچزسے گھاس کو مکمل طورپرنہیں کاٹا جائے گاتاکہ پیس اٹیک کے لیے مدد گار ثابت ہوسکے۔دریں اثناٹیسٹ سیریز کے لیے میچ آفیشلز کااعلان بھی کردیاگیا۔ کماردھرما سینا ،کرسٹو فر ،گیپینی اورشرف الدولہ امپائر ہوں گے جبکہ سر رچی رچرڈ سن آئی سی سی میچ ریفری کی ذمہ داری نبھائیں گے ۔
