عالمی ادارۂ صحت نے بچوں کی ہلاکتوں پر بھارت سے وضاحت طلب کرلی ہے۔
بتایا گیا ہے کہ بعض ممالک میں کھانسی کے شربت کے استعمال کے بعد متعدد بچوں کی اموات رپورٹ ہوئیں، جس کے بعد ادارے نے بھارت سے تفصیلی جواب مانگا ہے۔
عالمی ادارۂ صحت کا کہنا ہے کہ بھارت میں تیار کیے گئے بعض کھانسی کے شربت میں خطرناک کیمیکلز کی موجودگی کے شواہد ملے ہیں، جو بچوں کی صحت کے لیے جان لیوا ثابت ہوسکتے ہیں۔ ادارے نے متعلقہ دوا ساز کمپنیوں سے فوری کارروائی اور معیارات پر عمل درآمد یقینی بنانے کی ہدایت کی ہے۔
بھارتی وزارتِ صحت نے عالمی ادارۂ صحت کے خط کی تصدیق کرتے ہوئے کہا ہے کہ معاملے کی تحقیقات جاری ہیں۔ حکام کے مطابق اگر دوا ساز کمپنیوں کی غفلت ثابت ہوئی تو ان کے خلاف سخت قانونی کارروائی کی جائے گی۔
واضح رہے کہ گزشتہ برس بھی افریقہ میں بھارتی کھانسی کے شربت کے باعث درجنوں بچوں کی اموات رپورٹ ہوئی تھیں، جس پر عالمی سطح پر بھارت کی دوا ساز صنعت پر سنگین سوالات اٹھائے گئے تھے۔
