اسلام آباد: رکن قومی اسمبلی محمود خان اچکزئی کی اپوزیشن لیڈر تقرری کی درخواست جمع کروادی گئی۔
اطلاعات کے مطابق پاکستان تحریک انصاف کی جانب سے محمود خان اچکزئی کی بطور اپوزیشن لیڈر تقرری کی درخواست ا سپیکر قومی اسمبلی سردار ایاز صادق کے آفس میں جمع کروادی گئی ہے، تحریک انصاف کے تین اراکین نے درخواست پر دستخط نہیں کیے۔
بتایا گیا ہے کہ دستخط نہ کرنے والے تحریک انصاف کے حمایت یافتہ تینوں ارکان بیرون ملک ہیں، علی افضل ساہی، عمر فاروق اور صاحبزادہ سلطان بیرون ملک ہیں۔
ملک میں موجود تمام ممبران نے محمود خان اچکزئی کو بطور اپوزیشن لیڈر قومی اسمبلی مقرر کرنے کے لیے جمع کروائی جانے والی درخواست پر دستخط کیے۔
جس کے بعد تحریک انصاف نے محمود خان اچکزئی کو اپوزیشن لیڈر بنانے کے لیے 74 اراکین کے دستخطوں کے ساتھ قومی اسمبلی سیکرٹریٹ میں باضابطہ درخواست جمع کروا دی۔
تحریک تحفظ آئین پاکستان کے ترجمان نے بتایا کہ آج پاکستان تحریک انصاف کی جانب سے محمود خان اچکزئی کی بطور اپوزیشن لیڈر نامزدگی کی درخواست قومی اسمبلی میں جمع کروا دی گئی ہے۔ درخواست سپیکر قومی اسمبلی و سیکرٹری قومی اسمبلی کی عدم موجودگی کی وجہ سے اسپیشل سیکرٹری مشتاق احمد کو جمع کروائی گئی۔
ان کا کہنا ہے کہ یہ درخواست اسد قیصر سیکرٹری جنرل تحریک تحفظ آئین پاکستان ، ملک عامر ڈوگر چیف وہیپ پاکستان تحریک انصاف قومی اسمبلی، حسین احمد یوسفزئی ترجمان تحریک تحفظ آئین پاکستان اور خالد یوسف چودھری وکیل بانی چیئرمین پاکستان تحریک انصاف عمران خان نے جمع کروائی۔
