گھوٹکی : مسلح ڈاکوؤں نے گھوٹکی میں مرید شاخ انٹرچینج کے قریب ایم فائیو موٹر وے پر کوئٹہ جانے والی مسافر بس پر حملہ کردیا۔ عینی شاہدین کے مطابق ڈاکوؤں نے اچانک بس پر شدید فائرنگ کی، جس کے نتیجے میں کئی مسافر زخمی ہوگئے اور علاقے میں شدید خوف و ہراس پھیل گیا۔
فائرنگ کے بعد بس کو زبردستی روکا گیا، مسافروں کو تشدد کا نشانہ بنایا گیا اور مسلح ڈاکو کم از کم 25 افراد کو اغوا کرکے اپنے ساتھ لے گئے۔ عینی شاہد مسافروں کا کہنا ہے کہ اغوا کار مسافروں کو قریبی گنے کی فصل میں لے گئے، جبکہ دیگر مسافر جان بچانے کے لیے کماد کے کھیتوں میں چھپ گئے۔
واقعے کی اطلاع ملتے ہی پولیس، رینجرز اور موٹر وے پولیس کی بھاری نفری موقع پر پہنچ گئی اور علاقے کو گھیرے میں لے کر ڈاکوؤں کے تعاقب اور سرچ آپریشن کا آغاز کر دیا گیا۔
ڈھرکی پولیس کے مطابق اغوا ہونے والے مسافروں کی حتمی تعداد کی تصدیق ابھی جاری ہے، جبکہ سرچ آپریشن مزید تیز کر دیا گیا ہے تاکہ مغویوں کو بحفاظت بازیاب کرایا جا سکے۔
