لانڈھی اسپتال چورنگی کے قریب تیز رفتار ٹرالر کی ٹکر سے موٹر سائیکل سوار خاتون جاں بحق ہوگئی، حادثے کے بعد ڈرائیور موقع سے فرار ہوگیا۔
پولیس کے مطابق حادثہ اس وقت پیش آیا جب موٹر سائیکل سوار خاتون لانڈھی اسپتال چورنگی کے قریب سے گزر رہی تھیں کہ عقب سے آنے والے 10 وہیلر ٹرالر نے انہیں کچل دیا۔ جاں بحق ہونے والی خاتون کی شناخت 26 سالہ بشریٰ کے نام سے ہوئی ہے، جو خود موٹر سائیکل چلا رہی تھیں۔
واقعے کی اطلاع ملتے ہی پولیس اور ریسکیو ٹیم موقع پر پہنچ گئی، خاتون کی لاش کو ضابطے کی کارروائی کے لیے جناح اسپتال منتقل کر دیا گیا۔ اسپتال ذرائع کے مطابق خاتون کو سر اور جسم کے مختلف حصوں پر شدید چوٹیں آئی تھیں جو جان لیوا ثابت ہوئیں۔
حادثے کے فوراً بعد ٹرالر کا ڈرائیور گاڑی چھوڑ کر فرار ہوگیا، تاہم پولیس نے ٹرالر کو تحویل میں لے لیا ہے۔ پولیس حکام کا کہنا ہے کہ ڈرائیور کی گرفتاری کے لیے تلاش جاری ہے اور قریبی سی سی ٹی وی کیمروں کی مدد سے بھی شواہد اکٹھے کیے جا رہے ہیں۔
پولیس کے مطابق ابتدائی تحقیقات میں حادثے کی وجہ تیز رفتاری اور لاپرواہی سامنے آ رہی ہے، واقعے کا مقدمہ درج کرنے کی قانونی کارروائی مکمل کی جا رہی ہے۔ شہریوں نے مطالبہ کیا ہے کہ ہیوی ٹریفک کے بے قابو ہونے پر مؤثر اقدامات کیے جائیں تاکہ قیمتی جانوں کا ضیاع روکا جا سکے۔
