گورنر خیبر پختونخوا فیصل کریم کنڈی نے پشاور اور نیویارک کو سسٹر سٹی قرار دینے کی منظوری کا خیرمقدم کیا ہے۔
انہوں نے کہا کہ اس شراکت داری کے تحت دونوں شہر معیشت، تعلیم اور اسکل ڈیولپمنٹ سمیت مختلف شعبوں میں باہمی تعاون کریں گے، جبکہ نیویارک کے ساتھ سسٹر سٹی بننے سے نوجوانوں کے لیے نئے تعلیمی اور تکنیکی مواقع میسر آئیں گے۔
گورنر خیبر پختونخوا کے مطابق سسٹر سٹی کا درجہ ملنے سے صوبے کے لیے جدید صنعتوں میں روزگار کے مواقع تک رسائی بہتر ہو جائے گی۔
نیویارک کے میئر آفس نے خیبر پختونخوا کابینہ کے معاہدے کا مسودہ گورنر ہاؤس کو ارسال کر دیا ہے، جبکہ میئر آفس نے اس شراکت داری کو عالمی سطح پر شہری تعاون کی ایک مثبت مثال قرار دیا ہے۔
پشاور اور نیویارک کے درمیان سسٹر سٹی کا اسٹیٹس قائم ہونے سے دونوں شہروں کے باہمی تعلقات مضبوط ہوں گے اور تعلیم، ثقافت، تجارت سمیت دیگر شعبوں میں تعاون کے نئے امکانات پیدا ہوں گے۔
