نئی دہلی/مرکز حکومت نے شمال مشرقی خطہ، جموں و کشمیر، لداخ اور انڈمان و نکوبار جزائر کا سفر کرنے والے مرکزی سرکاری ملازمین کے لیے لیو ٹریول کنسیشن (ایل ٹی سی) کے تحت خصوصی ہوائی سفر کی سہولت کو 25 ستمبر 2028 تک بڑھا دیا ہے۔
پرسنل اینڈ ٹریننگ ڈپارٹمنٹ (ڈی او پی ٹی) کی جانب سے جاری کردہ خط کے مطابق، سینٹرل سول سروسز (لیو ٹریول کنسیشن) رولز، 1988 کے تحت یہ خصوصی التزام 26 ستمبر 2026 سے 25 ستمبر 2028 تک موثر رہے گا۔ اہل ملازمین چار سال کی مدت والے ایک بلاک میں اپنے ایک ہوم ٹاؤن ایل ٹی سی کو تبدیل کرکے ان چار میں سے کسی بھی ایک خطے کا سفر کر سکتے ہیں۔
محکمے نے کہا کہ جن ملازمین کا ہوم ٹاؤن اور ہیڈ کوارٹر ایک ہی جگہ پر ہے، وہ اس سہولت کے تحت ایل ٹی سی تبدیل کرنے کے اہل نہیں ہوں گے۔ جبکہ جن ملازمین کا ہوم ٹاؤن ان چار علاقوں میں سے کسی ایک میں ہے، وہ اپنے ہوم ٹاؤن ایل ٹی سی کو باقی تین علاقوں میں سے کسی ایک کا سفر کرنے کے لیے تبدیل کر سکتے ہیں۔
توسیع شدہ اسکیم میں نئے بھرتی ہونے والے ملازمین کے لیے بھی اضافی سہولت دی گئی ہے۔ وہ چار سال کے ایک بلاک میں ملنے والے تین ہوم ٹاؤن ایل ٹی سی میں سے ایک کو شمال مشرقی خطہ، انڈمان و نکوبار جزائر، جموں و کشمیر یا لداخ کے سفر کے لیے تبدیل کر سکتے ہیں۔ اس کے علاوہ اسی مدت میں جموں و کشمیر یا لداخ کے سفر کے لیے ایک اضافی تبدیلی کی بھی اجازت ہوگی۔
ہوائی سفر کے اہل ملازمین مقررہ شرائط کے تحت اپنے ہیڈ کوارٹر سے اس کلاس میں ہوائی سفر کر سکتے ہیں جس کے وہ حقدار ہیں۔
عام طور پر ہوائی سفر کے اہل نہ ہونے والے ملازمین کچھ مقررہ راستوں پر اکانومی کلاس میں جہاز سے سفر کر سکتے ہیں۔ ان میں کولکاتا یا گوہاٹی سے شمال مشرقی خطہ، کولکاتا، چنئی یا وشاکھاپٹنم سے پورٹ بلیئر نیز دہلی یا امرتسر سے جموں و کشمیر یا لداخ کا سفر شامل ہے۔ ہیڈ کوارٹر سے ان مقررہ انٹری پوائنٹس تک سفر کے لیے ملازمین کو اپنے عام سفری حق کے مطابق سفر کرنا ہوگا۔
ڈی او پی ٹی نے ہوائی سفر کے اہل نہ ہونے والے ملازمین کو مقررہ شرائط کے تحت براہ راست اپنے ہیڈ کوارٹر سے شمال مشرقی خطہ، انڈمان و نکوبار جزائر، جموں و کشمیر یا لداخ کے لیے اکانومی کلاس میں ہوائی سفر کرنے کی سہولت بھی برقرار رکھی ہے۔
یہ ہوائی سفر کی سہولت ان معاملات میں بھی لاگو ہوگی جہاں ملازمین اسے ہندوستان میں کہیں بھی سفر کرنے والی ایل ٹی سی کے تحت یا اجازت ملنے پر ہوم ٹاؤن ایل ٹی سی کی جگہ لیتے ہیں۔ حکومت نے مسلسل مختلف ادوار میں اس خصوصی شق کو جاری رکھا ہے۔
قابل ذکر ہے کہ مرکزی حکومت نے اس سہولت کے غلط استعمال سے متعلق بھی خبردار کیا ہے۔ وزارتوں اور محکموں سے ایئر لائنز کے ساتھ ہوائی ٹکٹوں کی تصدیق کر کے یہ یقینی بنانے کو کہا گیا ہے کہ ملازمین کی طرف سے دعویٰ کی گئی رقم اصل ہوائی کرائے کے مطابق ہے۔
ڈی او پی ٹی نے کہا، “ایل ٹی سی کے کسی بھی غلط استعمال کو سنجیدگی سے لیا جائے گا۔” محکمے نے واضح کیا کہ قواعد و ضوابط کی خلاف ورزی کرنے والے ملازمین کے خلاف مناسب کارروائی کی جائے گی۔
